بۆچی جۆ بایدن رەتیكردەوە مەسرور بارزانی ببینێت؟
نها نیوز- هەواڵەكان
مەسرور بارزانی، سەرۆك وەزیرانی كاربەڕێكەری هەرێمی كوردستان بە سەردانێك لە واشنتۆنی پایتەختی ئەمریكایە، بەڵام سەرۆكی ئەو وڵاتەو جێگرەكەی رەتیانكردوەتەوە لەگەڵیدا كۆببنەوە.
پێگەی ( washington free beacon)ی ئەمریكی لەزاری سەرچاوەیەكەوە بڵاویكردووەتەوە،"شاندی حكومەتی هەرێمی كوردستان بە سەرۆكایەتی مەسرور بارزانی فشاریان كردووە بۆ ئەوەی لەگەڵ جۆ بایدن، سەرۆكی ویلایەتە یەكگرتووەكانی ئەمریكا و كامالا هاریس، جێگری سەرۆكی ئەمریكا كۆببنەوە".
وەك ئەو سەرچاوەیە ئاماژەی بۆكردووە، ئیدارەی بایدن ئەو داواكارییەی مەسرور بارزانییان رەتكردووەتەوە، ئەوەش بەهۆی ئەوەی ئەمریكا دەیەوێت لەسەر ئاستی باڵا محەمەد شیاع سودانی، سەرۆكی حكومەتی عێراق و جۆ بایدن كۆببنەوەو بۆچوونیان وابووە، دیداری مەسرور بارزانی و بایدن بەر لە دیداری سەرۆكی حكومەتی عێراق، كێشە بۆ ئەمریكا دروستدەكات".
پێگە ئەمریكییەكە باسی لەوەشكردووە، "لەگەڵ ئەوەی كورد هاوپەیمانی ئەمریكایە، بەڵام بایدن لەگەڵیان كۆنابێتەوە، ئەوەش وەك رازیكردنی كۆماری ئیسلامی ئێران لەم كاتەدا تەماشا دەكرێت".
سەرچاوە ئەمریكییەكە ئەوەشی ئاشكراكردووە، "شوێنگرەوەی بایدن بۆ كۆبوونەوە لەگەڵ شاندەكەی حكومەتی هەرێمی كوردستان، بریتین لە ئەنتۆنی بلینكن، وەزیری دەرەوەی ئەمریكا و جەیك سۆلیڤان، ڕاوێژكاری ئاسایشی نیشتمانیی ئەمریكا".
|