یەکێتی: سەردانەكەی بافڵ تاڵەبانی فەرمیی و گرنگە بۆ ئەم دۆخە هەستیارەی هەرێم

نهانیوز- هەواڵەكان

لێپرسراوی بۆردی راگەیاندنی یەکێتی رایگەیاند سەردانەکەی بافڵ تاڵەبانی، بۆ رووسیا سەردانێکی فەرمییە و لە کاتێکی هەستیاردایە." 
 
لەتیف نێروەیی، لێپرسراوی بۆردی راگەیاندنی یەکێتیی نیشتمانیی کوردستان، رایگەیاند، "سەردانەکە فەرمییە و سەردانێکی گرنگە و لە کاتێکدا هەستیاردایە."
 
لێپرسراوی بۆردی راگەیاندنی یەکێتیی نیشتمانیی کوردستان وتییشی، "لە سەردانەکەدا کاک بافڵ، سەرۆکی یەکێتی و شاندەکەی چاویان بە ژمارەیەک بەرپرسی پلە باڵای رووسیا کەوتووە و دەکەوێت، لەنێویاندا دیداریان لەگەڵ سێرگی لاڤرۆڤ، وەزیری دەرەوەی رووسیا و میخائیل بۆگدانۆڤ، نوێنەری تایبەتی سەرۆکی رووسیا بۆ کاروباری رۆژهەڵاتی نێوەڕاست و ئەفریقا و جێگری وەزیری دەرەوەی رووسیا کەوتووە."

ئەوەش دەخاتەروو، لەكۆبوونەوەكاندا، باسی دۆسیە و تەوەرەکانی سیاسی، ئابووری و ئەمنی کراوە و دەکرێت، چەندین بابەتی گرنگ تاوتوێ دەکرێن، بەتایبەت ئەوانەی پەیوەستن بە عێراق و هەرێمی کوردستان.
 
لەتیف نێروەیی وتیشی، "سەردانەکە بۆ پتەوکردنی پەیوەندییەکانی سیاسیی و تۆکمەکردنییانە لەگەڵ رووسیا کە لەگەڵ هەرێمی کوردستان و عێراق و یەکێتی نیشتمانی کوردستان پەیوەندیی لەمێژینەی هەیە و بەشێکیان دەگەڕێتەوە بۆ سەردەمی خوالێخۆشبوو مام جەلال."
 
رۆژی پێنجشەممە، 28ـی ئاداری 2024، بافڵ تاڵەبانی بە سەردانێک گەیشتە مۆسکۆ. لە سەردانەکەدا، دەرباز کۆسرەت رەسووڵ، لێپرسراوی مەکتەبی پەیوەندییەکانی یەکێتی یاوەریی دەکات.
 
س.ر