كاوەشێخ عەبدوڵڵا
قوڕبەسەر میللەتێك تۆ سەرۆكی بیت
قسەی ژنێك بە مێردەكەی
محەمەد ساعید مەراغەیی دیپلۆماتكارێكی كۆنی ئێرانەو لە سێ دەورانی جیاوازی وڵاتەكەیدا (قاجارو رەزاشاو حەمەڕەزای كوڕی) بەرپرسیارێتی پێدراوە لە كونسوڵەوە تا وەزیری دەرەوەو پاشان سەرۆكوەزیران.
مەراغەیی چیرۆكێكی بەناوبانگی هەیە كە خۆی گێڕاویەتییەوە دەڵێ: كاتێك فەرمانم بۆ هات بوومەتە كونسوڵ، چوومەوە ماڵەوە بە ژنەكەم وت: ئافرەت مژدەم بەرێ بووم بە كونسوڵ. خانم لچێك هەڵدەقورتێنێ و دەڵێ رەفیقی تۆ سەفیرە تۆ تازە دەبیتە كونسوڵ!
ساڵان زۆر ناخایەنێ، مەراغەیی دەبێتە سەفیری ئێران لە توركیا، دەچێتەوە بە ژنەكەی دەڵێ: ئەوا بووم بە سەفیر كە تۆ پێت گرنگ بوو، ژنەكەی بەلالووتێكەوە دەڵێ رەفیقی تۆ وەزیرە كەچی تۆ دڵت بە سەفیریی خۆشە!
نەخێر زۆرنابات بە لوتفی شاهەنشا مەراغەیی دەبێتە وەزیری دەرەوەی ئێران، هەمان هەواڵی گرنگ دەباتەوە بۆ ژنەكەی كە وا مێردەكەی بوو بە شتە گرنگەكە، وەزیری دەرەوە، خانم زۆر شتەكەی لا سووكەو دەڵێ: پیاوی خەڵكی كە دەبێتە سەرۆك وەزیران شاگەشكە دەبێ كەچی ئەوەی من بە وەزیریی!
شانسی مەراغەیی شا هەڵیدەبژێرێت تا ببێتە سەرۆك وەزیرانی ئێران، ئیتر ئەمە دوایین پۆستی گرنگەو دەبێ خانم پیرۆزبایی بكات. كاتێك سەرۆك وەزیران دەچێتەوە ماڵەوەو بەژنەكەی دەڵێ وابووم بە سەرۆك وەزیران، ژنەكەی دەڵێ: پیف.. ئەی قوڕ بەسەر ئەو میللەتەی تۆ دەبیتە سەرۆك وەزیرانەكەی!
ژن وا نەبێ بۆچی باشە.. لە هەمووان زیاتر مێردی خۆی ناسیوە كەچی پاشاو خەڵك ئەوپەڕی دەسەڵاتی دەدەنێ
دەبێ چەند محەمەد ساعید مەراغەیی تر هەبن كە سەرۆكی دنیایەك خەڵكن، بەڵام ناتوانن تەنانەت متمانەی ژنەكانیشیان بەدەست بهێنن جچای میلەتێك!