ئەنجومەنی مەڵبەندی هەولێری یەکێتی تاوتوێی ئەنجامدانی كۆنگرەی كرد
ئاژانسی نها..
بەیانی ئەمڕۆ شەممە لە هۆڵی شەهیدانی ١ی شوبات لەشاری هەولێر، بە ئامادەبوونی شاڵاو كۆسرەت ڕەسول لێپرسراوی مەڵبەندی ٣ی ڕێكخستنی هەولێر و عەدنان موفتی و سەعدی ئەحمەد پیرە ئەندامانی مەكتەبی سیاسی و د. ڕێواز فایق، ئارێز عەبدوڵا و هەرێم كەمال ئاغا ئەندامانی سەركردایەتی لەگەڵ ئەنجومەنی مەڵبەندی هەولێر كۆبوونەوە.
لە كۆبوونەوەكەدا بەوردیی تاوتوێی دۆخی ناوخۆی یەكێتی و هەنگاوەكان بەئاراستەی بەستنی كۆنگرەیەكی تەندروست و سەركەوتوو، بەشداری كارای یەكێتی لە جومگەكانی حوكمڕانی و ڕۆڵ و پێگەی هەولێر لەنێو هاوكێشە سیاسییەكان كرا.
هەر لە کۆبوونەوەکەدا لێپرسراوی مەڵبەندی هەولێر رایگەیاند، ئەنجامدانی كۆنگرە بۆ هەموو حزبێكی سیاسی یەكێكە لە پڕەنسیپەكانی دیموكراسی و هەوڵدان بۆ نوێبوونەوەی حزب و ئۆرگانەكانی و چۆنیەتی بەرنامە و شێوازی كاركردنی.
هاوکات سەعدی ئەحمەد پیرە ئەندامی مەكتەبی سیاسی و لێپرسراوی مەكتەبی پەیوەندییە گشتییەكان رایگەیاند، ئەنجامدانی كۆنگرە بۆ یەكێتی هەنگاوێكی گرنگە و پێویستە بنرێ، بەڵام ئەوەی گرنگە ئەم كۆنگرەیە كۆنگرەیەكی تەندروست بێ و بتوانێ یەكێتی بخاتەوە سەر شاڕێگای خۆی.
|