چۆن لە رەمەزاندا خۆم لە قەبزی بپارێزم؟
نها نیوز - هەواڵەکان
د. حەبیب مەحمود، پسپۆڕی نەشتەرگەریی هەرس و جگەر سەبارەت بە خۆپاراستن لە قەبزی لە رەمەزاندا زانیاری بۆ میدیای یەکێتی دەخاتە روو و دەڵێت "رۆژووی رەمەزان ھەندێک جار دەبێتەھۆی قەبزی و کێشەی کۆئەندامی ھەرس لە ھەندێک لە رۆژووەواناندا، بەتایبەتی ئەوانەی پێش رەمەزان کێشەی قەبزییان ھەبووە. زۆرجار بەھۆی ئەم قەبزییەوە دووچاری مایەسیری و قڵیشانی کۆم و خوێن بەربوون دەبن، ئەمەش بەھۆی تێپەڕبوونی پیسایی و پاشماوەی خواردنی زۆر رەق بەناو ناوپۆشی کۆمدا.
گرنگترین ھۆکارەکانی قەبزی لە رەمەزاندا ئەمانەن:
ـ گۆڕانکاری لە جۆری خواردن و شێواز و کاتی خواردن کە ھۆکارێکە بۆ گۆڕانکاری لە جوڵەی ریخۆڵەکان و بەتاڵکردنەوەی ریخۆڵەکان.
ـ کەمیی ئاوخواردنەوە لەکاتی بەڕۆژووبووندا کە دەبێتەھۆی وشک بوونەوە و ھۆکارێکە بۆ رەقبوونی پاشماوەی خۆراک و پیسایی.
ـ کەمبوونەوەی جووڵە و چالاکیی رۆژانە، لە رەمەزاندا زۆربەی خەڵکی پشوو دەدات یان لە ماڵەوەن یان کاتەکان بە خەوتن بەسەر دەبەن، ئەمەش ھۆکارێکە بۆ قەبزی.
چی بکرێت بۆ خۆپاراستن لە قەبزی لە رەمەزاندا؟
ـ خواردنەوەی بڕێکی زۆر لە ئاو و شلەمەنی لەنێوان بەربانگ و پارشێودا.
ـ گرنگی بدرێت بەو خواردنانەی کە بڕێکی زۆر ریشاڵیان تێدایە وەک سەوزە و میوە.
ـ ئەنجامدانی وەرزش و جووڵە و چالاکیی بەردەوام.
ـ بەکارھێنانی ھەندێک دەرمان بۆ ئاسانکاری لە شلبوونەوەی پیسایی.
"باشترە کە پارشێو بکرێت، چونکە یارمەتیدەر دەبێت بۆ رێگریکردن لە وشکبوونەوە.
|