کۆمکاری عەرەبی ئەگەری هێرشکردنە سەر عێراق لەلایەن ئیسرائیلەوە تاوتوێدەکات
نها نیوز - هەواڵەکان
کۆمکاری عەرەبی، لەسەر داوای عێراق و بۆ تاوتوێکردنى هەڕەشەکانی ئیسرائیل بۆ ئەگەرى هێرشکردنەسەر ئەو وڵاتە کۆبوونەوەیەکی نائاسایی ئەنجام دەدات.
بڕیارە ئەمڕۆ یەکشەممە، کۆمکاری عەرەبی لەسەر ئاستی نوێنەرانی هەمیشەیی کۆببێتەوە و تاوتوێی هەڕەشەکانی ئیسرائیل بۆ هێرشکردنەسەر عێراق بکات.
بەگوێرەى ئاژانسی هەواڵی عێراقی، کۆبوونەوەکە نائاساییە و وڵاتی یەمەن کە ئێستا سەرۆکایەتیی کۆمکارەکەى لایە، کۆبوونەوەکە بەڕێوەدەبات.
ئەمەش لەکاتێکدایە، لە ماوەی رابردوودا لە عێراقەوە، گروپە چەکدارەکان کە شارەزایان باس لەوە دەکەن سەر بە ئێرانن، چەندینجار هێرشیان کردووەتە سەر ئیسرائیل و لە ئەنجامدا کوژراو و برینداری لێکەوتووەتەوە. ئیسرائیلیش بەم هۆکارە، چەندینجار هەڕەشەی هێرشکردنە سەر ئەو ناوچانەی عێراقی کردووە، کە ئەو گروپانە پێگەیان تێیاندا هەیە.
پێشتریش، حوسام زەکی، ئەمینداری گشتیی کۆمکارى عەرەبی رایگەیاندبوو، لەپاش هەڕەشەکانی ئیسرائیلەوە، عێراق بە فەرمی داوای کۆبوونەوەی نائاسایی ئەنجوومەنی کۆمکاری عەرەبی کردووە.
|