نها نیوز – هەواڵەکان
راوێژکاری دارایی سەرۆک وەزیرانی عێراق رایگەیاند، نرخی دۆلار لە بازاڕە نافەرمییەکان کاریگەریی لە سەقامگیری گشتیی نرخی ئەو دراوە ناکات لە عێراق، بەڵکو ئەو سەقامگیرییەی لە ئێستادا دینار بەرامبەر بە دۆلار هەیەتی، سەقامگیرییەکی راستەقینەیە.
مەزهەر محەمەد ساڵح، راوێژکاری دارایی سەرۆک وەزیرانی عێراق بە ئاژانسی هەواڵیی عێراقی راگەیاند "ئامرازێکی نێودەوڵەتی هەیە کە چەند رێکارێک بە ناوی رۆڵی بانکی لە پارەدارکردنی داواکارییەکانی دۆلار بەسەر هەژمارە بانکییە نێودەوڵەتییەکانی عێراق جێبەجێ دەکات، هەروەها ئامرازێکی ناوخۆیی هەیە کە سودمەند دەبێت لە کاریگەریی ئامرازە دەرەکییەکان بە ئامانجی بەدەستهێنانی قازانج لە مامەڵەکانی دۆلاری کاش.
مەزهەر محەمەد ساڵح ئەوەشی خستەڕوو "بەهۆی بەهێزیی بازاڕی دراوی ناوەندیی فەرمی، نرخی دۆلار بەرامبەر دینار لە بازاڕە نا فەرمییەکان گرنگی و کاریگەرییەکی ئەوتۆی نابێت لەسەر سەقامگیریی گشتیی بەهاکان، وەک دەبینرێت لە ئێستادا بەهای دۆلار لە بازاڕەکان جێگیرە.
راوێژکارەکەی سودانی باسی لەوەشکرد "سەقامگیریی نرخی دۆلار، دینار بەرەو سەقامگیریی دەرەکی دەبات، لە ئێستاشدا هەڵئاوسانی ساڵانە 3٪ تێپەڕناکات، ئەوەش لە راپۆرتی رێکخراوە دارایی و ئابورییە نێودەوڵەتییەکان دەرەدەکەوێت.
ئەوەشی ئاشکراکرد "بەهۆی هێزی یەدەگە بیانییەکانەوە، پشتیوانییەکی باش لە دیناری عێراقی دەکرێت، لە ئێستادا یەدەگی دۆلاری عێراق 100 ملیارە.
ئەوەشی روونکردەوە "سەقامگیریی ئێستای دینار بەرامبەر بە دۆلار، سەقامگیرییەکی راستەقینەیە و ئەوەش بەهۆی هێز و کاریگەریی ئامراز و سیاسەتی نەختینەیی و داراییەوەیە.