هه‌واڵێكى گرنگ له باره‌ى كه‌شوهه‌واوه بڵاوده‌كرێته‌وه
پلەی گەرما لە هەرێمی کوردستان بەرزبووەتەوە و خێرایی (با)ش لە بەشێکی سلێمانی زیادبووە، کەشناسیش دەڵێت، سبەی وەک ئەمڕۆ گەرم دەبێت، به‌ڵام لەگەڵ دەستپێکردنی وەرزی هاوین، کەشەکە فێنکتر دەبێت.
ئەمڕۆ چوارشەممە کەشناسیی هەرێم راگەیه‌نراوێكى بڵاویکردووه‌ته‌وه و رایگه‌یاند، پلەی گەرمای ئەمڕۆ و سبەی لە پلەی گەرمای دوێنێ نزیکدەبێتەوە.
لاى خۆیشیه‌وه ئاراس جەبار شارەزای کەشناسی ئاشكرایكردووه، پلەی گەرمای سبەی بەراورد بەئه‌مڕۆ پلەیەکی دیکە بەرزدەبێتەوە و لە هەندێک ناوچەی گەرمیان، دەگاتە 49 پلەی سیلیزی.
به‌وته‌ى ئاراس جەبار، "یەکەم رۆژی هاوینی ئەمساڵ دەکەوێتە 21 یان 22ی مانگی حوزەیران و لەگەڵ دەستپێکی هاویندا پلەی گەرما دادەبەزێت و ئەوکەشەش تاوەکو 27ی حوزەیران بەردەوامدەبێت، دوای ئەوە پلەی گەرما جارێكى دیكه بەرزدەبێتەوە".
لە دوێنێوە رەشەبا سلێمانی و دەوروبەری گرتووەتەوە، بۆ ئه‌وه‌ش ئاراس جەبار دەڵێت:"رەشەبا لە هەندێک کاتدا بەتایبەت شەوان دەگاتە 40 کیلۆمەتر لە کاتژمێرێکدا؛ لە سنووری سلێمانی، ئیدارەی راپەڕین و ناوچە شاخاوییەکانی پارێزگای هەولێر خێرایی با تاوەکو رۆژی هەینی بەردەوامدەبێت".
|