نها نیوز – هەواڵەکان
سەرۆک وەزیرانى عێراق لەگەڵ ئەندامانى ئەنجوومەنى پارێزگاى کەرکوک لە پێکهاتەى تورکمان کۆبووەوە و جەختیکردەوە لە پێویستیی کارکردنى پێکەوەیی فراکسیۆنەکان و پەراوێزنەخستنى هیچ لایەنێک.
ئەمڕۆ شەممە، محەمەد شیاع سودانى، سەرۆک وەزیرانی عێراق لەگەڵ ئەندامانى ئەنجوومەنى پارێزگاى کەرکوک لە پێکهاتەى تورکمان کۆبووەوە و لە کۆبوونەوەکەدا جەختیکردەوە لە گرنگیی پێشخستنى بەرژەوەندیى دانیشتووانى کەرکوک لە هەر رێککەوتنێکى نێوان هێزە سیاسییە براوەکانى هەڵبژاردن.
سەرۆک وەزیرانی عێراق راشیگەیاند "پێویستە فراکسیۆنەکان وەک یەک تیم و دوور لە پەراوێزخستن و دوورخستنەوەى هێزە نیشتمانیی و کۆمەڵایەتیەکانى کەرکوک کاربکەن.
سودانى، فراکسیۆنەکانى ئەنجوومەنى پارێزگاى کەرکوکى هاندا ئیدارەیەکى سەرکەوتوو پێکبهێنن و رێکبکەون لەسەر پۆستى پارێزگار کە بتوانێت داخوازییەکانى دانیشتوانى شارەکە دەستبەربکات.
ناوبراو پشتیوانیی خۆیشى دەربڕى بۆ کارى ئەنجوومەنى پارێزگا و دەستەبەرکردنى هەموو پێداویستییەکان لە پێناو باشکردنى دۆخى ئابوورى و بەهێزکردنى هەڵمەتى بونیاتنانەوەى ژێرخان و خزمەتگوزارییەکانى کەرکوک.
ئەمەش پاش ئەوە دێت، رۆژى پێنج شەممەی پێشوو، محەمەد شیاع سودانی، سەرۆک وەزیرانی عێراق لەگەڵ پێکهاتەى عەرەبى لە کەرکوک کۆبووەوە و بڕیارەیشە لەگەڵ ئەندامانى ئەنجوومەنى پارێزگاکە لە پێکهاتەى کورد کۆببێتەوە.