بەرهەمهێنانی نەوت له دو كێڵگه‌ی نه‌وتی هه‌رێمی كوردستان ده‌ستیپێكرده‌وه
نها نیوز - هەواڵەکان
کۆمپانیای شاماران ڕایگه‌یاند، بەرهەمهێنانی نەوت له هه‌ریه‌كه له بلۆکی نه‌وتی ئەتروش و سەرسنک ده‌ستیپێكرده‌وه، به‌ڵام ده‌ڵێت، تاوەکو کۆتایی مانگی 10ی ئه‌مساڵ بەهۆی زیانەکان ناتوانن بە تەواوی توانا، نەوت لە سەرسنک بەرهەمبهێنن.
کۆمپانیای شاماران ئه‌مڕۆ پێنجشه‌ممه8 ئابی 2025 لە راپۆرتێکدا رایگەیاند، "بە تەواوی تواناوە لە بلۆکی ئەتروش دەستمان بە بەرهەمهێنانی نەوت کردەوە، بەڵام لە سەرسنک بە نیوەی تواناوە دەستمان بە بەرهەمهێنانی نەوت کردوەتەوە".
په‌یوه‌ست به زیانه‌كان، له ڕاگه‌یه‌ندراوه‌كه‌دا هاتوه، "لە کێڵگەی سەرسنک سێ کۆگای نەوت و بۆرییەکانیان زیانیان بەرکەوتوە، تاوەکو کۆتایی مانگی 10 بەهۆی زیانەکان ناتوانین بە تەواوی توانا، نەوت لە سەرسنک بەرهەمبهێنین".
کێڵگەی نەوتی سەرسەنگ دەکەوێتە سنوری (پارێزگای دهۆک)ەوە، ڕوبەری کێڵگەکە (420) کیلۆمەتر دووجایە، دابەشبووە بەسەر دوو ناوچەی نەوتی جیاوازدا کە بریتین لە ناوچەی (سوارە توکەو ڕۆژهەڵاتی سوارە توکە)، هەر یەکێک لەو دوو ناوچەیە سێ کۆگای نەوتی سەربەخۆی تێدایە.
کێڵگەی نەوتی ئەتروش، یەکێکە لە کێڵگە گرنگ و بەرهەمهێنەرەکانی نەوت لە هەرێمی کوردستان و لە ساڵی 2011 نەوتی تێدا دۆزرایەوە و بۆ یەکەم جاریش لە ساڵی 2017 دەست بە بەرهەمهێنانی نەوت کراوە لە کێڵگەکەدا. وەک کۆمپانیا نەوتییەکانی کێڵگەکە ئاماژەی بۆ دەکەن، بەرهەمی نەوتی کێڵگەکە "نەوتی کوالیتی بەرزە کە بنکەیەکی گەورەی بەرهەمهێنانی هەیە و توانای گەشەکردنی بەرچاوی هەیە".
له‌ماوه‌ی مانگی ته‌موزی ڕابردودا ژماره‌یه‌ك فڕۆكه‌ی بێفڕۆكه‌وان ئاڕاسته‌ی چه‌ند كێڵگه‌یه‌كی نه‌وت و چه‌ند ناوچه‌یه‌كی هه‌رێمی كوردستان كرا، هه‌رچه‌نده لیژنه‌ی لێكۆڵینه‌وه لەلایەن محەمەد شیاع سودانی، سەرۆک وەزیرانی عێراقەوە پێكهێنراوه، به‌ڵام تائێستا ئه‌نجامه‌كان ئاشكرا نه‌كراون.
|