هەرێم ناردنی 80 هەزار بەرمیل نەوتەکەی بۆ بەغدا رەتکردەوە

نها نیوز - هەواڵەکان

بەوتەی عه‌لی‌ حه‌مه‌ساڵح، به‌رپرسانی‌ هه‌رێم ئاماده‌نه‌بوون 80 هه‌زار به‌رمیل نه‌وته‌كه‌ راده‌ستی‌ به‌غدا بكه‌ن.

عه‌لی‌ حه‌مه‌ ساڵح، بڕیاردەری رەوتی هەڵوێست له‌ راگه‌یه‌ندراوێكدا ئاشکرایکرد "ئه‌مڕۆ وه‌زاره‌تی نه‌وتی عێراق ئاماده‌كاری كرد بۆ وه‌رگرتنی (80 هه‌زار) به‌رمیل نه‌وتی ڕۆژانه‌.. به‌ڵام هه‌رێم به‌بیانوی ره‌زامه‌ندی كۆمپانیاكان نه‌یدا!".

وتیشی "سبه‌ی پێویسته‌ نه‌وته‌كه‌ بده‌ن بۆ ئه‌وه‌ی مووچه‌ی مانگی شه‌ش بێت..".

عەلی حەمەساڵح ئەوەشی خستە روو "ئه‌گه‌ر ئه‌م 80 هه‌زار به‌رمیل نه‌وته‌ و 120 ملیار دیناری داهاتی ناوخۆ بدرێت، راسته‌وخۆ مووچه‌ی مانگی شه‌ش دێت".

"له‌ ئه‌گه‌ری به‌رده‌وامی هه‌رێم تاوه‌كو ساڵێكی تر مووچه‌ به‌رده‌وام ده‌بێت". بڕیاردەری رەوتی هەڵوێست وای وت

ئەوەیش لەکاتێکدایە،‌‌ ئه‌مڕۆ حه‌یان عه‌بدولغه‌نی، وه‌زیری نه‌وتی عێراق و جێگری سه‌رۆك وه‌زیرانی عێراق له‌میانی‌ سه‌ردانێكی‌ بۆ كه‌ركوك رایگه‌یاند، ئێستا به‌رهه‌مهێنان له‌ كێڵگه‌كان، كه‌ تاوه‌كو ئێستا كارده‌كه‌ن له‌ كوردستان نزیكه‌ی 130 هه‌زار به‌رمیل نه‌وتی رۆژانه‌یه‌، 50 هه‌زار به‌رمیل نه‌وت بۆ به‌كاربردنی رۆژانه‌یه‌ و رێككه‌توون له‌گه‌ڵ "برایانی هه‌رێمی كوردستان 80 هه‌زار به‌رمیله‌كه‌ی دیكه‌ وه‌ریده‌گرین و له‌رێگه‌ی به‌نده‌ری جه‌یهانی توركیاوه‌ هه‌نارده‌ی ده‌كه‌ین".