نهانیوز-هەواڵەکان
ئەندامێکی ئەنجومەنی نوێنەرانی عێراق ئاشکرای کرد، رۆژی یەکشەممەی هەفتەی داهاتوو، ئەنجومەنی وەزیرانی عێراق لەبارەی مووچەی مانگی شەشەوە بڕیاردەدات.
شوان کەلاری، ئەندامی ئەنجومەنی نوێنەرانی عێراق بە میدیای پارتی راگەیاند، کۆبوونەوەکەی دوێنێی ئەنجومەنی وەزیرانی عێراق زۆر باش بووە و بۆچوونەکان بەو ئاراستەیەدابوون، کە لە سەرەتای هەفتەی داهاتوودا، بڕیار لەسەر مووچەی مانگی شەش بدەن.
وتیشی، ئەم بەیانییە حکومەتی هەرێم وەفدی ناردە بەغداد و تەنها ئەوە ماوە، ئەنجومەنی وەزیرانی عێراق بڕیار لە مووچە بدات؛ هەموو ئەگەرەکانیش بەو ئاراستەیەن، رۆژی یەکشەممە مووچەی مانگی شەش بنێردرێت.
جەختیشی لەوەکردەوە “حکومەتی عێراق گەیشتووەتە ئەو بڕوایەی کێڵگە نەوتییەکانی هەرێم تەنها دەتوان 130 هەزار بەرمیلی رۆژانە بەرهەمبهێنن”.
ئەمە لە کاتێکدایە کە بریارە رۆژی یەکشەممە کۆبوونەوەی ئەنجومەنی وەزیرانی عێراق بەرێوە بچێت ودوای وردبینی بۆکاری لیژنەکان، بریار لە ناردنی مووچە بدرێت.
لە کۆبوونەوەى دوێنێى ئەنجوومەنى وەزیرانى عێراقدا بڕیاردرا، هەفتەیەک مۆڵەت بۆ کارى لیژنەکان درێژبکرێتەوە و داواش لە هەرێمى کوردستان کرا شاندى خۆى بۆ ئەو مەبەستە بنێرێتەوە بەغداد، ئەمڕۆش شاندەکەى هەرێمى کوردستان لە بەغدادن، کە پێکهاتوون لە لیژنەى چاودێریی دارایی و وەزارەتى دارایی و ئابوورى، بەمەبەستى روونکردنەوە لەبارەى داهات و خەرجیی و گفتوگۆ لەبارەى مووچەى مانگەکانى حوزەیران و تەمموز.