دڵنیای لە هەناردەکردنەوەی نەوتی هەرێم درا

نها نیوز - هەواڵەکان

وتەبێژی "ئەپیکور" رایگەیاند، پابەندن بە ماددەى 12ـی یاسایی بودجەی عێراق بۆ تێچووی دەرهێنان و گواستنەوەی نەوت بە 16 دۆلار، دەشڵێت "لەسەر هەناردەکردنەوەی نەوت هەرێم و بەغدا لە گفتوگۆ بەردەوامن".

مایڵز کاگینز، وتەبێژی کۆمەڵەی پیشەسازی نەوتئ کوردستان "ئەپیکور" بە میدیای یەکێتی وت "گفتوگۆکانی نێوان هەردوو حکومەتی هەرێمی کوردستان و عێراق لەبارەى دەستپێکردنەوەی هەناردەی نەوت بەردەوامە و ئەو دەنگۆیانەش رەتدەکەینەوە کە باس لەوە دەکەن کۆمەڵەکەمان تێچووی دەرهێنان و گواستنەوەی نەوتی رەتکردبێتەوە".

وتیشی "ئەو 16 دۆلارەی بۆ دەرهێنان و گواستنەوە دانراوە بەگوێرەی ماددەى 12ـی یاسای بودجەی عێراقە و بەشێوەکی کاتی بۆ ماوەی دوو مانگ دەبێت و پاشان کۆمپانیایەکی وردبینی جیهانی بەگوێرەى هەر کێڵگەیەک، پێداچوونەوە بۆ تێچووی بەرهەمهێنان دەکات".

وتەبێژەکەی ئەپیکور، دووپاتیکردەوە، کۆمپانیاکانى کۆمەڵەکە پابەندن بە یاسای بودجەی عێراق و لەو بارەیەوە هیچ گرفتێکیان نییە.

سەبارەت بە مەرج و داواکارییەکانیشیان، کاگینز ئاشکرایکرد "مەرج و داواکارییەکانمان وەکو خۆیەتی و هیچ گۆرانکارییەکی بەسەردانەهاتووە، کە ئەویش رێککەوتنی نووسراوە تیایدا شایستە داراییەکانی پێشووتر و داهاتووشمان گرەنتی بکرێت".

جێی باسە، کۆمەڵەی پیشەسازی نەوتی کوردستان ناسراو بە (ئەپیکور) لە 8 کۆمپانیای نەوتی جیهانی پێکهاتووە کە 60%ـی بەرهەمهێنانی نەوتی هەرێمی کوردستانیان لایە و پێش هێرشە درۆنیییەکان رۆژانە 250 هەزار بەرمیل نەوتیان بەرهەمدەهێنا.