لەبارەی مووچەی مانگی شەشەوە و پاشگەزبوونەوەی هەرێم لە رێککەوتنەکە زانیاری شۆکهێنەر راگەیەندرا

نها نیوز – هەواڵەکان

ئەندامێکی پەرلەمانی کوردستان ڕایگەیاند، هیچ بڕیارێك لە بەغداوە نیە بۆ ناردنی مووچەی مانگی (حوزەیران/6)، هەرێمیش مەرجی ناردنی داهاتی نەوت و نانەوتی بۆ بەغدا ناردنی مووچەی ئەو مانگەیە، بەوەیش "هەست دەكرێت پاشگەزبوەنەوە لە ڕێككەوتنەكە هەیە".

عەلی حەمەساڵح، ئەندامی پەرلەمانی کوردستان کە هاوکات بڕیاردەری لیستی هەڵوێستە لە پەیامێكی ڤیدیۆیدا ئاشکرایکرد "تاكو ئێستا هیچ بڕیارێك لە بەغداوە نییە بۆ ناردنی مووچەی مانگی (حوزەیران/6)ـی فەرمانبەران و مووچەخۆرانی هەرێم، داوای 120 ملیار دیناری داهاتی ناوخۆی هەرێم بۆ مانگی شەش دەكەن كە تا ئێستا نەنێردراوە".

وتیشی "لە ئێستادا ئاستی بەرهەمهێنانی نەوت لە هەرێمی كوردستان گەیشتووەتە نزیك 190 هەزار بەرمیل، كە 50 بۆ ناوخۆیە و 140 هەزارەكەی ڕادەستی عێراق بكرێت، تا بەرهەمهێنان دەگاتەوە 230 هەزار".

عەلی حەمەساڵح ئاماژەی بەوەشداوە، هەرێمی كوردستان داوا دەكات مووچەی مانگی (حوزەیران/6) لەلایەن عێراقەوە خەرج بكرێت، دواتر دەستدەكات بە هەناردەكردنەوەی نەوت و ناردنی 120 ملیار دیناری داهاتی ناوخۆ".

ئەو پەرلەمانتارەیە دەشڵێت "هەست دەكرێت پاشگەزبووەنەوە لە ڕێككەوتنەكەی نێوان هەرێم و بەغدا هەیە. ئەگەر هەرێم پەشیمانبووەتەوە با ڕێككەوتنەكە بەفەرمی هەڵبوەشێنێتەوە و بە خەڵكی كوردستانیش بڵێت، كە بەدیلی بۆ ئەو دۆخە چیە!".