تەمویلی مووچەی مانگی هەشت لە عێراق دەستیپێکرد
نهانیوز-هەواڵەکان
لە کاتێکدا فەرمانبەرانی هەرێمی کوردستان مووچەی مانگی شەشیان وەرنەگرتووە، عێراق دەستی بە دابەشکردنی مووچەی مانگی هەشت کرد.
ئەمڕۆ دووشەممە 4ی ئاب وەزارەتی دارایی عێراق ڕایگەیاند کە دەستیان بە دابەشکردنی مووچەی مانگی ئابی خانەنشینانی شارستانی و سەربازی کرد.
ئەوەشی خستەڕوو کە ڕێکارەکانی گواستنەوەی پارەیان بۆ دەستەی نیشتمانیی خانەنشینی تەواو کردووە، بۆ ئەوەی لە ڕێی بانکەکانەوە بەسەر خانەنشیناندا دابەش بکرێت.
وەزارەتی دارایی عێراق ڕاشیگەیاند، بە هۆی پشووی بانکەکانەوە دابەشکردنی مووچە چەند ڕۆژێک دواکەوتووە و جەختیشیکردەوە کە مووچە تا کۆتایی ساڵی دارایی زامنکراوە و ئەو دەنگۆیانەش کە باس لە نەبوونی دراوی نەختینە دەکەن، ناڕاستن.
دابەشکردنی مووچەی مانگی ئابی عێراق لە کاتێکدایە کە تا ئێستا مووچەی مانگی حوزەیرانی فەرمانبەرانی هەرێمی کوردستان دەستیپێنەکردووە و میدیای یەکێتیش بڵاویکردەوە کە حکومەتی هەرێم بە هیچ شێوەیەک ئامادە نییە نەوت ڕادەستی بەغدا بکات و لە ناردنی 120 ملیار دینارەکەی داهاتی ناوخۆش پەشیمان بووەتەوە، ئەوەش گرفتی دواکەوتنی مووچە بەردەوام دەکات.
|