شاندی هەرێم و عێراق لەسەر مووچە نەگەیشتنە رێککەوتن

نها نیوز - هەواڵەکان

سەرچاوەیەکی ئاگادار لە بەغدا رایگەیاند، هەردوو شاندی هەرێمی کوردستان و عێراق سەبارەت بە مووچە و رادەستکردنی نەوت و داهاتی نانەوتی نەگەیشتوونەتە رێککەوتن.

سەرچاوەیەکی ئاگادار لە بەغدا بە میدیای یەکێتی وت "هەردوو شاندی هەرێمی کوردستان و عێراق سەبارەت بە مووچە، رادەستکردنی نەوت و داهاتی نانەوتی نەگەیشتوونەتە رێککەوتن و ئەو شاندەی بڕیاربوو سەردانی هەولێر بکات، هەر لە بەغدادەوە راپۆرتی خۆیان پێشکەش بە سەرۆک وەزیران کردووە".

ئەو سەرچاوەیە ئاماژەی بەوەشدا، هەرێمی کوردستان بە هیچ شێوەیەک ئامادەنییە نەوت رادەستی بەغدا بکات، ئەمەش پێچەوانەی رێککەوتنی نێوان هەولێر و بەغدایە.

هەر بەپێی میدیای یەکێتی، هەرێمی کوردستان تەنیا بۆ ئەم مانگە و بە مەرجی ناردنی مووچە، ئامادەیە بڕی 120 ملیار دینار لە داهاتی ناوخۆ رادەستی بەغدا بکات، بەڵام بۆ مانگەکانی داهاتوو ئامادە نییە ئەو بڕە پارەیە رادەست بکات، چونکە بە وتەی خۆیان، ئەو بڕە زۆرە و ناتوانن دابینی بکەن.

ئاشکراشکرد، کێشەیەکی دیکەی نێوان هەرێمی کوردستان و عێراق، پەیوەندیی بە رێگەنەدانە بە شاندی عێراق بۆ وردبینیکردنی داهاتی نانەوتی.

سەرچاوەکەی میدیای یەکێتی وتیشی "لەم چەند رۆژەی رابردوودا شاندێکی هەرێمی کوردستان هاتووەتە بەغدا و بەفەرمیی شاندەکەی عێراقیان ئاگادارکردووەتەوە، کە رێگەیان پێنادەن وردبینی بۆ داهاتی ناوخۆ بکەن، بەوهۆیەوە شاندەکە هەر لە بەغداوە راپۆرتێکیان پێشکەش بە سەرۆک وەزیرانی عێراق کردووە و لەو رێگرییە ئاگاداریان کردووەتەوە.

ئەوەش لەکاتێکدایە، بۆ جێبەجێکردنى رێککەوتنەکەى نێوان هەولێر و بەغدا و ناردنى مووچەى مووچەخۆرانى هەرێمى کوردستان و دەستپێکردنى هەناردەى نەوت، چوار لیژنە لە نێوان هەولێر و بەغدا، دەستى بەکارەکانى کرد.

لیژنەکان بریتین لە لیژنەى تەوتین - خەرجى راستەقینە و خەرجى هەرێمى کوردستان لە بەشە بودجەى 2023 -2025 - داهاتى ناوخۆ- رێژەى بەرهەمهێنانى نەوت.

هاوکات دواى ئەم راپۆرتەى لیژنەکە لە بەغداوە داویانە بە سودانى، چاوەڕواندەکرێت لە کۆبوونەوەى رۆژى سێشەممەى ئەنجوومەنى وەزیرانى عێراق، هەڵسەنگاندن بۆ راپۆرتەکان بکرێت و بڕیار لەبارەى چارەنوسى مووچەوە بدرێت.