نها نیوز – هەواڵەکان
سەرچاوەیەک لەنێو لیژنەی دارایی پەرلەمانی عێراق بە نهای راگەیاند، هەرێم ئاستی بەرهەمهێنانی نەوتی گەیاندووەتە 125 هەزار بەرمیل نەوت و بەغدا رەزامەندە لەو ژمارەیە 100 هەزاری بنێرێت، بەوەیش ئەگەر هەرێم پابەند بێت، بەغدا مووچەی مانگی شەش رەوانە دەکات. دەشڵێت "هەواڵەکە دڵخۆشکەرە چونکە هەرێم نەوتەکەی ئامادەیە".
سەرچاوەیەک لەنێو لیژنەی باڵای دارایی پەرلەمانی عێراق کە نەیویست ناوی ئاشکرا بکرێت سەبارەت بە بڕی بەرهەمهێنانی نەوت لە هەرێم لەلێدوانێکی تایبەتدا بە نها نیوزی وت "توانای بەرهەمهێنانی نەوتی هەرێم گەیشتووەتە نزیکەی 125 هەزار بەرمیل نەوت لە رۆژێکدا بەڵام دەشتوانێت لەو بڕە زیاتریش بەرهەم بهێنێت، جگە لەو 50 هەزار بەرمیلەی کە بۆ ناوخۆی هەرێم بەرهەمی دەهێنێت".
وتیشی "هەرێم دەتوانێت لەم بڕەیە 110 بۆ 120 هەزاری بدات بە بەغدا لەگەڵ 120 ملیار دینارەکەی داهاتی ناوخۆ، بۆ ئەوەی زەمانەتی هاتنی مووچەی مانگی شەش بکات".
دەربارەی بەربەستەکانی بەردەم مووچەکە، ئەو سەرچاوەیە ئاشکراشیکرد "بەربەست ئەوەیە کە هەرێم دەبێت پابەند بێت، داهاتی نەوتی و نانەوتییەکەش بدات، ئەوکاتەیە بەغدا ئامادە دەبێت مووچە بنێرێت".
لەبارەی ئەوەی تاچەند هەواڵەکان لەسەر ناردنی مووچەی مانگی شەش دڵخۆشکەرن؟ ئەندامەکەی لیژنەی دارایی پەرلەمانی عێراق رایگەیاند "هەواڵەکان دڵخۆشکەرن بەو ئاڕاستەیەی کە هەرێم نەوتەکەی ئامادەیە و بەغداش بەو بڕەیە رازییە، چونکە ئەگەر لە 100 هەزار بەرمیل کەمتر بێت؛ عێراق ناتوانێت بە بەرمیل بینێرێت، چونکە خەرجیەکەی زیاترە".
پەیوەست بەوادەی ناردنی نەوتەکەش بە سۆمۆ یان عێراق، ئەو سەرچاوەیە دەڵێت "وادەی رادەستکردنی نەوتەکە بە سۆمۆ دیارینەکراوە، بەڵام خۆی نەوتەکە کەی ئامادە ببێت دەبێت هەرێم رادەستی بکات یان بە بەغدا یان بە سۆمۆ".
سەرچاوەکەی نها ئاماژەش بە گەڕانەوەی ئەو کۆمپانیا بیانییەکان دەکات بۆ کێڵگەی نەوتی هەرێم، ئەو هۆکارەکەی دەخاتە روو و، دەڵێت "چونکە گرێبەستیان هەیە لەگەڵ هەرێم، ئەگەریش کێڵگە نەوتییەکان جێبهێڵن بەشێوەیەکی کاتییە، کە مەترسییەکە نەماوە بەدڵنییاییەوە دەبێت بگەڕێنەوە بۆسەر کارەکانی خۆیان".
ئاماژەی بەوەشدا، "لەئێستادا دەنگۆکان لەسەر مووچەی مانگی شەش ئەوەیە کە هەرێم دەبێت پابەند بێت بەو رێککەوتنەی کە واژۆی کردووە، کە 120 هەزار لە داهاتی نانەوتی لەگەڵ ئەو بڕە نەوتەش و پاشان رادەستکردنی بەغدا. هەربۆیە کە هەرێم رێککەوتنەکەی جێبەجێیکرد؛ عێراقیش هیچ بەربەستێک دروست ناکات و مووچە دەنێرێت".
لەبارەی ئەوەی ئایا کە ئەم هەفتەیە بەغدا مووچە خەرجدەکات، ئەو سەرچاوەیە جەختیکردەوە کە دەمێنێتەوە لەسەر ئەوەی کە ئایا هەرێم ئەو بڕەی دیاریکراوە خەرجی دەکات یاخود نا؟.
سەرچاوەکەی نها ئەوەشی وت "هیوادارم هەرێم پابەند ببێت، گەر نەبێت دووبارە مووچەخۆران زەرەرمەند دەبن. ماقولیەتی تێدایە هەرێم تۆ 120 ملیار دینار نەگۆڕیتەوە بە ترلیۆنێک دینار، نەوتەکەش 500 بۆ 600 ملیاری کرد دەکاتە نزیکەی 700 ملیار، هەربۆیە دەبێت پابەند بن پێیەوە".