چارەنووسی مووچەی مانگی شەش کرایەوە

نها نیوز – هەواڵەکان

بەپێی هەواڵێکی میدیای پارتی، حکومەتی کاربەڕێکەر بەتەواوی ئامادەیی دەربڕیوە و بە پێشکەشکردنی راپۆرتی هەرچوار لیژنە هاوبەشەکە کە وادەکەی سبەی یەکشەممەیە، چارەنوسی مووچە یەکلایی دەکرێتەوە.

میدیای پارتی بڵاویکردەوە، هەرێم ئامادەیی تەواوی دەربڕیوە و چاوەڕوان دەکرێت ئەم هەفتەیە چارەنووسی ناردنی مووچەی مانگی شەشی فەرمانبەرانی هەرێمی کوردستان یەکلابکرێتەوە، ئەمەش بەندە بەو ڕاپۆرتانەی کە چوار لیژنە هاوبەشەکەی نێوان هەولێر و بەغدا پێشکەشی دەکەن و سبەی یەکشەممە دوایین وادەی کارەکانیانە.

ئاماژەی بەوەشکردووە، سبەی یەکشەممە دوایین وادەی کارکردنی ئەو چوار لیژنە هاوبەشەیە کە بۆ جێبەجێکردنی ڕێککەوتنی نێوان هەولێر و بەغدا لەسەر بوارەکانی (نەوت، داهاتی ناوخۆ، بودجە، و هەژماری من) پێکهێنراون. هەرچەندە تەنها لیژنەی نەوت سەردانی هەرێمی کوردستانی کردووە، بەڵام سەرجەم لیژنەکان دەبێت ڕاپۆرتی کۆتایی خۆیان ئاراستەی لیژنەی باڵای وزاری و محەممەد شیاع سودانی، سەرۆک وەزیرانی عێراق بکەن.

راشیگەیاندووە، سودانی پێی وایە؛ ڕێککەوتنەکە تەنها بۆ یەک مانگ بووە، ئەمەش وایکردووە چارەسەری کێشەکە دووبارە بگەڕێتەوە بۆ کاری لیژنەکان.

لەلایەکی دیکەشەوە، لە نوێترین پێشهاتدا و بۆ چارەسەرکردنی گرێکوێرەی نەوت، ئەمڕۆ شەممە لیژنەیەکی تایبەتمەندی عێراق سەردانی هەولێری کردووە و دوو ئەرکی سەرەکییان هەیە، ئەوانەش لێکۆڵینەوە لە هێرشە درۆنییەکان دیاریکردنی سەرچاوەی هێرشەکان و دانانی میکانیزمێک بۆ ڕێگریکردن لە دووبارەبوونەوەیان. دووەمیش هەڵسەنگاندنی بەرهەمی نەوت ئامادەکردنی ڕاپۆرتێک لەسەر توانای بەرهەمهێنانی ئێستای کێڵگە نەوتییەکانی هەرێم و چۆنیەتیی بەرزکردنەوەی ئاستی بەرهەمهێنان.


بەپێی زانیارییەکانی ئەو میدیایە، ئاستی بەرهەمهێنانی نەوتی هەرێمی کوردستان لە ئێستادا بۆ نزیکەی 150 هەزار بەرمیل لە ڕۆژێکدا بەرزبووەتەوە. حکومەتی هەرێمی کوردستان ئامادەیی خۆی بۆ چەند هەنگاوێک نیشان داوە، کە بریتین لە گەرەنتی ئەمنی هەروەها داواش دەکات حکومەتی فیدراڵی گەرەنتی پاراستنی کێڵگە نەوتییەکان و ئەو کۆمپانیایانە بکات کەلە هەرێم کار دەکەن.

هاوکات ئامادەیە بەرهەمهێنان زیاد بکات ئەگەر گەرەنتی ئەمنی پێبدرێت، ئامادەیە ئاستی بەرهەمهێنان بۆ 280 هەزار بەرمیلی ڕۆژانە بەرز بکاتەوە.

خاڵێکی دیکە لە داواکارییەکان، ڕادەستکردنی نەوت و داهاتە کە حکومەتی هەرێم ئامادەیە تەواوی نەوتی بەرهەمهاتوو (جگە لەو 50 هەزار بەرمیلەی بۆ پێداویستی ناوخۆیە) ڕادەستی کۆمپانیای سۆمۆ بکات. هەروەها وەزارەتی دارایی کوردستان ئامادەیی نیشانداوە بۆ ناردنی 120 ملیار دیناری داهاتی ناوخۆ بۆ بەغدا.

میدیاکەی پارتی هێمای بۆ ئەوەشکردووە، بڕیارە ڕاپۆرتی هەرچوار لیژنەکە لە چوارچێوەی یەک ڕاپۆرتی گشتگیردا ئامادە بکرێت و پێشکەش بە محەمەد شیاع سودانی، سەرۆک وەزیرانی عێراق بکرێت. پەسەندکردنی ڕاپۆرتەکە لەلایەن سودانییەوە، ڕێگا بۆ دەستپێکردنەوەی هەناردەی نەوتی کوردستان و ناردنی مووچەی مانگی شەش خۆش دەکات.