نهانیوز- هەواڵەکان
سبەی دابەشکردنی مووچەی مانگی 8 لە بەغدا دەست پێدەکات، بەڵام مووچه‌خۆرانی هه‌رێم هێشتا مووچه‌ی مانگی حوزه‌یرانیان وه‌رنه‌گرتووه و دوومانگ لە دوای عێراقەوەن، سەرچاوەیەکیش لە حکومەتی هەرێم رایگەیاند، ئەم هەفتەیە بڕیار لەسەر ناردنی مووچەی هەرێم دەدرێت.
به‌پێی زانیاریی میدیا عیراقییه‌كان، "سبه‌ینێ 3ی ئابی2025 خانه‌نشینی مه‌ده‌نی و سه‌ربازی له‌عیراق مووچه‌ی مانگی ئاب وه‌رده‌گرن، به‌ڵام مووچه‌خۆرانی هه‌رێمی كوردستان تائێستا مووچه‌ی مانگی حوزه‌یرانیان وه‌رنه‌گرتووه و به‌مه‌ش پێدانی شایسته داراییه‌كانی مووچه‌خۆرانی هه‌رێم دوومانگ له‌دوای مووچه‌خۆرانی عیراقه‌وه‌یه.
له‌و باره‌یه‌شه‌وه هه‌رێم كه‌مال ئاغا سه‌رۆكی فراكسیۆنی یه‌كێتی له ئه‌نجومه‌نی نوێنه‌رانی عیراق بە میدیای فەرمی یەکێتیی راگه‌یاند، بۆ ئه‌وه‌ی ناردنی مووچه‌ی مووچه‌خۆرانی هه‌رێم كێشه‌ی تێنه‌كه‌وێت، پێویسته هه‌ردوو حكومه‌تی هه‌رێم و فیدراڵ پایه‌ندبن به‌و لێكتێگه‌یشتنه‌ی له‌نێوانیاندا هه‌یه".
سەرچاوەیەک لە حکومەتی هەریم رایگەیاند، سبەینێ یەک شەممە راپۆرتی کۆتایی لە بارەی بڕی بەرهەم هێنانی نەوت لە هەرێم دەدرێت بە سودانی و رۆژی سێ شەممە ئەو راپۆرتە لەگەڵ خۆی دەباتە کۆبونەوەی ئەنجومەنی وەزیران و ئەم هەفتەیەش بڕیار لەسەر ناردنی مووچەی هەردوو مانگەکە دەدرێت.
میدیای نزیك لە پارتییش لە بارەی کاتی ناردنی داهاتی ناوخۆی هەرێم بۆعێراق رایگەیاند، هەرێمی كوردستان داوای مووچەی مانگی شەشی كردووە و تاوەكو گرەنتی نەكرێت 120 ملیار داهاتی ناوخۆ ڕەوانە ناكات.