بەمزووانە 150 ملیار دینار لە بەغداوە بۆ هەرێم دەنێردرێت

نها نیوز – هەواڵەکان
ئەندامێکی لیژنەی کشتوکاڵ لە پەرلەمانی عێراق رایدەگەیەنێت، بۆ پارەی گەنمی جوتیاران، نووسراویان ئاراستەی سەرۆک وەزیرانی عێراق کردووە و بڕیارە لە ئایندەیەکی نزیک 150 ملیار دیناری دیکە بخرێتە سەر هەژماری بانکی هەرێمی کوردستان.

زۆزان کۆچەر، ئەندامی لیژنەی کشتوکاڵ لە پەرلەمانی عێراق رایگەیاند "نووسراوێکمان ئاڕاستەی محەممەد شیاع سوودانی، سەرۆک وەزیرانی عێراق و وەزارەتی بازرگانی کردووە، بۆ ئەوەی ٪51ی پارەی گەنمی جووتیاران کە لای عێراق ماوە خەرج بکرێت".

دەشڵێت "بڕیارە لە ئایندەیەکی نزیک 150 ملیار دیناری دیکە بخرێتە سەر هەژماری بانکی هەرێمی کوردستان".

ئەمەش لەکاتێکدایە، تاوەکو ئێستا 319 ملیار دینار پارەی ڕادەستکردنی گەنمی جووتیارانی هەرێمی کوردستان نێردراوە و 279 ملیار دینار ماوە کە لەلایەن وەزارەتی بازرگانیی عێراقەوە خەرج بکرێت.