ئێران وەکو وەڵامێک هەڕەشەی توند لە ئیسرائیل دەکات
نها نیوز - هەواڵەکان
ئاژانسی تەسنیم لەزاری راوێژکاری عەلی خامنەییەوە بڵاویدەکاتەوە، سەرکردە سەربازییەکان و گەورە بەرپرسانی وڵاتەکە خۆیان بۆ وەڵامدانەوەی توندی ئیسرائیل ئامادەکردووە.
عەلی لاریجانی، گەورە راوێژكاری عەلی خامنەیی رابەری باڵای شۆڕشی ئێران کە هاوکات ئەندامی ئەنجومەنی دیاریكردنی بەرژەوەندیەكانی رژێمی ئەو وڵاتەیە لە چاوپێکەوتنێکیدا لەگەڵ ئاژانسی هەواڵی "تەسنیم" وتی "سەركردە سەربازییەكان و گەورە بەرپرسانی وڵات خۆیان بۆ وەڵامدانەوەی قەوارەی زایۆنی ئامادە دەكەن و، بنەمای یەكلاكردنەوەی حساباتەكان لەگەڵ ئیسرائیل هێشتا لەجێی خۆیەتی".
لاریجانی بە ئاژانسەکەشی راگەیاندووە "سەردانەكەم بۆ سوریا و لوبنان و گەیاندنی پەیامی خامنەیی بە ئەسەد و سەرۆكی پەرلەمانی لوبنان بووە". ناوبراو وتیشی "پەیامەكە خاڵی گرنگی تێدا بووە بۆ سوریا و لوبنان لەم قۆناغەدا".
راوێژکارەکەی خامنەیی ئاماژە بەوەش دەکات "بۆ سوریا و لوبنان گرنگ بوو ئێران جەخت لە پشتیوانی مقاوەمە بكاتەوە لەم بارودۆخەدا و درێژە بدات بە گرنگیدان بە پرسە هەرێمایەتیە هەستیارەكان.
|