کۆمەڵی دادگەری بەشداری لە حکومەت رەتکردەوە و ناشچێتە پەرلەمان

نها نیوز - هەواڵەکان

ئەنجومەنی باڵاى کۆمەڵی دادگەریی کوردستان لەمیانی راگەیەندراوێکیدا هه‌ڵوێستى توند لەبارەی ئەنجامی هەڵبژاردنەکان نیشانده‌دات‌ و ئاشکرای دەکات "وەک کۆمەڵی دادگەری نەک لە حکومەت بەشدارنابین، بەڵکو لە راوێژ و باس ‌و خواستی ئەوەداین لە پەرلەمانێکی دیزاینکراو کە پێکهاتەکەی بەدەرە لە خواستی هاوڵاتییان بەشداری نەکەین".

ئەو ئەنجومەنە ئەوەشی راگەیاندووە "پێچه‌وانه‌ى چاوه‌ڕوانییه‌كان نەک رێگریی لە ساختەکاری نەکرا، بەڵکو ساختەکاریەکان جۆریی‌ و رێکخراوو كرا بەشێوەیەک هەموو کەس دەرکی پێنەکا".

دەقى ڕاگەیەنراوەکە:

بەناوی خودای بەخشندەی میهرەبان
جەماوەری کوردستان
حیزب و لایەنەسیاسیەکانی کوردستان
ئەندام و لایەنگران و دەنگ دەرانی کۆمەڵ
ئێمە وەک کۆمەڵی دادگەریی ئەگەرچی سەرەتا هیوامان هەڵچنی بەهەندێ گۆڕانکاری کە لەیاسای هەڵبژاردن و شێوازی بەڕێوەچونی کە لەلایەن کۆمیسیۆنی باڵای سەربەخۆی هەڵبژاردنەکانی عێراقەوە بەڕێوە دەبرێ، ڕێکارەکانی ساختەکاری کەم دەبنەوە، بەڵام بەداخەوە وادەرنەچوو نەک ڕێگری لەساختەکاری نەکرا بەڵکو ساختەکاریەکان جۆریی و ڕێکخراوبوو بەشێوەیەک هەموو کەس دەرکی پێنەکا.
هەربۆیە لەگەڵ دەرچوونی ئەنجامەبەراییەکانی هەڵبژاردنەکان، بۆ ئێمەی کۆمەڵی دادگەری جێگەی سەرسوڕمان و باوەڕ نەکراوبوو، نەک سەرکردایەتی و ئەندامانی کۆمەڵ بەڵکو لەدەرەوەی کۆمەڵیش دەنگەکانی کۆمەڵ بەوڕێژە کەمیە جێگەی باوەڕ نین و کۆمەڵ ئەوئەنجامە رەد دەکاتەوە.
ئێمە دەپرسین کۆمەڵ کام ستەم و کام خیانەتی کردوە تاسزابدرێت و دەنگی کەم بکات، ئەوەی ئاشکرایەلایەنەکانی دەسەڵات دەستیان بەسەر قووت و موچەی هاوڵاتی دا گرتوە، ستەم و گەندەڵیان کردوە، ئەگەرساختەنەبێ چۆن دەنگی ئەوان زیاد دەکات و دەنگی کۆمەڵ کەم.
دوای بەدواداچون و گەیشتن بەزانیاریەکان گەشتینە ئەوڕاستیەی بەمەبەست و بەرنامەبۆداڕێژراو دەنگی کۆمەڵ پوچەڵ کراوە یان هەژمار کراوە بۆلایەنی تر، ئەم ساختەکاریە لای ئێمە قبوڵ کراو نییە و هەڵوێستی جدیمان دەبێ و سکاڵادەکەین لەکۆمیسیۆن و دادگای فدراڵی.
ڕای دەگەیەنین وەک کۆمەڵی دادگەری نەک لەحکومەت بەشدار نابین بەڵکو لەڕاوێژو باس و خواستی ئەوەداین لەپەرلەمانێکی دیزاین کراوکەپێک هاتەکەی بەدەرەلە خواستی هاوڵاتیان بەشداری نەکەین.
بەهەموولایەکی ڕادەگەیەنین کۆمەڵ سەربەخۆیە لەهەر هەنگاو و بڕیارێک لەداهاتوو، هەرئەم سەربەخۆیی بونەشە کە کۆمەڵ لەدەرەوەی هاوکێشەکان بێ و بەئامانج بگیرێ.
لەگەڵ لایەنەناڕازیەکانی تریش لە هەماهەنگی و وتووێژ دەبین و پشتیوان بەخودا داکۆکی لەدەنگی دزراوی هاوڵاتیان دەکەین.
کۆمەڵی دادگەریی کوردستان
ئەنجومەنی باڵا
٢٤/١٠/٢٠٢٤