قوباد تاڵەبانی هەنگاوێکی گرنگ لە بەرژەوەندی هەرێم دەنێت

نها نیوز - هەواڵەکان

قوباد تاڵەبانی، جێگری سەرۆکوەزیران ئەمڕۆ یەکشەمە (15\12\2024) لەگەڵ بەڕێوەبەر و سەرۆکی فەرمانگەکانی بەشدار لە پرۆسەی وەبەرهێنان لە پارێزگای سلێمانی کۆبووەوە و تیایدا تاوتوێی گیروگرفتەکانی بەردەم پرۆسەی وەبەرهێنان و چۆنییەتی چارەسەرکردنیان کرا.

لە دەستێپکی کۆبوونەوەکەدا قوباد تاڵەبانی دەستخۆشی لە بەڕێوەبەر و سەرۆکی فەرمانگەکان کرد بۆ هەوڵ و ماندووبوونیان لەماوەکانی رابردوودا، کە زۆرترین پرۆژەیان خستووەتەگەڕ و بە هۆی هەوڵەکانیانەوە سلێمانی لەماوەکانی رابردوودا پێشەنگ بووە لە وەبەرهێنان. جەختیشی کردەوە کە دەبێت بەردەوام بن لە هەوڵەکانیان و ئاسانکاری بۆ وەبەرهێنەران بکەن، چونکە ئامانجیانە سلێمانی لە ساڵانی داهاتووشدا هەر بە پێشەنگی بمێنێتەوە.

هەر لەم چوارچێوەیەدا ئاماژەی بەوەشدا بۆ چارەسەرکردنی گرفتەکانی بەردەم وەبەرهێنان بە هەموو شێوەیەک هاوکار و پشتیوانیان دەبێت.

لە بەشێکی تری کۆبوونەوەکەدا سەرۆکی فەرمانگە پەیوەندیدارەکانی راسپارد بۆ گەشەپێدانی وەبەرهێنان پلانێکی تۆکمە ئامادە بکەن و تیایدا شێوازی چارەسەرکردنی گرفتەکانی بەردەم پرۆسەکە دەستنیشان بکرێت وەک پلانێکی ستراتیجی بۆ داهاتووی ناوچەکە.

جێگری سەرۆک وەزیران ئاماژەی بەوەشدا کە پێویستە لەمەودوا زیاتر گرنگی بە پەرەپێدانی وەبەرهێنان لە بوارەکانی پیشەسازی و گەشتوگوزار بدرێت و لەم چوارچێوەیەدا هەموو جۆرە کارئاسانییەک پێشکەش بە وەبەرهێنەران بکرێت.