نها نیوز – هەواڵەکان
ئەندامێکی پەرلەمانی عێراق لەزاری محەمەد شیاع سودانی ئاشکرای دەکات، مووچەی موچەخۆرانی هەرێم مسۆگەرە، لەبارەی کێشەکانیشەوە سەرۆک وەزیران ئاماژەی بەوە داوە کە هەندێکجار بەهۆی کێشەی هونەرییەوە مووچە دوادەکەوێت، هۆکارێکی دیکەش کێشەی سیولەیە.
د. موسەنا ئەمین، ئەندامی پەرلەمانی عێراق لە فراکسیۆنی یەکگرتوو لەبارەی کۆبونەوەی سودانی لەگەڵ حزبەکەی لە سلێمانی باسیان لەچەند پرسێک کرد، ئەو وتی "بەشێکی کۆبونەوەکەمان لەگەڵ سودانی تایبەتبوو بەکێشەکانی مووچە، لەوبارەیەوە سودانی رایگەیاند؛ مووچەی مووچەخۆرانی هەرێمی کوردستان مسۆگەرەو پارەی پێویست بۆ مووچە دابیندەکەین، بەڵام هەندێکجار کێشە هونەرییەکان دەبنە هۆکاری دواکەوتنی".
وتیشی "لیستی مووچە جێگیرنییە و گۆڕانکاریی تێدادەکرێت، هۆکارێکی دیکەی دواکەوتنی مووچەش ئەوەیە هەندێکجار لە عێراق کێشەی سیولە دروستدەبێت".
پەرلەمانتارەکەی یەکگرتوو لە پەرلەمانی عێراق ئەوەشی خستە روو "سه‌باره‌ت به‌و كورتهێنانه‌ى له مووچه‌ى مانگه‌كانى 11 و 12دا رووده‌دات، سودانى پێی راگه‌یاندین؛ ئه‌وه كێشه‌یه‌ك نابێت و ئێمه گره‌نتى مووچه‌ى خه‌ڵكى كوردستان ده‌كه‌ین.
بەوتەی محەمەد شیاع سودانى، به‌گوێره‌ى بڕیارى دادگاى باڵاى فیدراڵى، ئەوان پابه‌ندین به‌دابینكردنى مووچه‌ى مووچه‌خۆرانى هه‌رێمى كوردستان.
ئەوەش لەکاتێکدایە، دوێنێ چوارشەممە محەمەد شیاع سودانی سەرۆک وەزیرانی عێراق سەردانی هەولێر و سلێمانیی کرد، پێکهێنانی حکومەت، هەناردەکردنەوەی نەوت، رێگەی گەشەپێدان و مووچە، تەوەری سەرەکیی کۆبونەوەكانى سودانی بوون له‌گه‌ڵ لایەنەکان.