نها نیوز - هەواڵەکان
ئێوارەی ئەمڕۆ محەمەد شیاع سودانی گەیشیتە سلێمانی و لەلایەن بافڵ تاڵەبانی پێشوازی لێکرا، پاشان وا بڕیارە لە دەباشان لەبارەی پرسی پێکهێنانی حکومەت و دووبارە خۆ کاندیدکردنەوەی سودانی و مووچەی هەرێم و چەندین پرسی گرنگی دیکە تاوتوێ بکرێت.
ئێوارەی ئەمڕۆ 13-11-2024، محەمەد شیاع سودانی سەرۆك وەزیرانی عێراق گەیشتە سلێمانی و لەلایەن بافڵ جەلال تاڵەبانی سەرۆكی یەكێتیی نیشتمانیی كوردستان و قوباد تاڵەبانی جێگری سەرۆك وەزیرانی حكومەتی هەرێم و د. هەڤاڵ ئەبوبەكر پارێزگاری سلێمانی و ژمارەیەك لە ئەندامانی مەكتەبی سیاسی یەكێتییەوە پێشوازی لێكرا، لە یەكەم وێستگەی سەردانەكەشیدا سەردانی مەزاری سەرۆك مام جەلالی كرد و تاجەگوڵینەی رێزو وەفای لەسەر مەزارەكەی دانا.
لەوبارەیەوە بێستون فایەق، راوێژكاری سەرۆكی یەكێتیی نیشتمانیی كوردستان بە ماڵپەڕی فەرمی حزبەکەی وت "پێدەچێت یەكێك لە پرسە گرنگەكانی كۆبوونەوەكە، پرسی جارێكی دیكە كاندیدبوونەوەی محەمەد شیاعی سودانی سەرۆك وەزیرانی عێراق بێت بۆ ئەو پۆستە، چونكە روونە كە یەكێتیی نیشتمانیی كوردستان هێزێكی كاریگەرە لە هەرێم و عێراق و تەنانەت ناوچەكەش، لەم رونگەیەشەوە پشتیوانی یەكێتیی نیشتمانیی كوردستان بۆ سەرۆك وەزیرانی عێراق گرنگە".
راشیگەیاند "هاوكات پرسی پێكهێنانی حكومەتی نوێی هەرێم و سەرژمێری گشتی لە عێراق و مووچە و بودجەی خەڵكی هەرێم و تەوتینی مووچەخۆرانی هەرێم لەكۆبوونەوەكەدا باسدەكرێن، كە یەكێتیی نیشتمانیی كوردستان پڕۆژەی خۆی لەسەر ئەو پرسانە هەیە".
ئەمڕۆ چوارشەممە 13ـی تشرینی دووەمی 2024، محەمەد شیاع سودانی سەرۆك وەزیرانی عێراق بەسەردانێكی چاوەڕوانكراو گەیشتە هەولێر و لەلایەن بەشێك لە كاربەدەستانی حكومەتی هەرێم پێشوازی لێكرا، هەر لە درێژەی سەردانەكەیدا ئێوارەی ئەمڕۆ گەیشتە شاری سلێمانی و لەلایەن سەرۆكی یەكێتیی نیشتمانیی كوردستان و جێگری سەرۆك وەزیرانی حكومەتی هەرێمەوە پێشوازی لێكرا.