راگەیەندراوێک لە مەسرور بارزانییەوە لەبارەی کۆبوونەوەکەی لەگەڵ سوودانی

نها نیوز – هەواڵەکان
مەسرور بارزانی، سەرۆکی حکومەتی کاربەڕێکەری هەرێمی کوردستان رایدەگەیەنێت، ئەمڕۆ لەگەڵ محەممەد شیاع سوودانی، سەرۆک وەزیرانی عێراق کۆبوونەتەوە و باسیان لە چەند پرسێک کردووە.
دەقی راگەیەندراوەکەی مەسرور بارزانی:
ئەمڕۆ لە فڕۆکەخانەی نێودەوڵەتی هەولێر، پێشوازیمان لە سەرۆک وەزیرانی فیدراڵ بەڕێز محەممەد شیاع  سوودانی کرد.
پاشان لە کۆبوونەوەیەکدا، سەرۆک وەزیرانی فیدراڵ، پیرۆزبایی لێکردین بەبۆنەی سەرکەوتنی هەڵبژاردنی پەرلەمانی کوردستان و ئاماژەی بەوە دا کە سەقامگیریی سیاسی هەرێمی کوردستان، بنەمایەکی گرنگیی سەقامگیریی هەموو عێراقە. سەرۆک وەزیرانی فیدراڵ، هەروەها جەختی لە گرنگیی پێکهێنانی کابینەی نوێی حکومەتی هەرێمی کوردستان کردەوە لە پێناو پەرەپێدانی زیاتری هاریکاری و هەماهەنگیی نێوان هەردوو حکومەتی هەرێم و فیدراڵ .
گفتوگۆمان لەبارەی  کێشە و پرسەکانی تایبەت بە مووچە و پشکی هەرێمی کوردستان لە بودجەی گشتی فیدراڵ، دەستپێکردنەوەی هەناردەکردنی نەوتی هەرێم و ئامادەکارییەکانی سەرژمێری گشتیی دانیشتووان لە عێراق کرد.
سەبارەت بە پرسی موچە،، جەختمان لە پێویستی دوورخستنەوەی پرسی خەرجکردنی مووچەی هەرێم لە هەر ناکۆکییەکی سیاسی کردەوە، لەبەر ڕۆشنایی بڕیاری دادگای باڵای فیدراڵی ، هاوشێوەی ناوچەکانی دیکەی عێراق.
دەربارەی دەستپێکردنەوەی هەناردەکردنی نەوتی هەرێمیش، جەختمان لە گرنگیی دەستپێکردنەوەی پرۆسەی هەناردەکردنەوەی نەوت لە زووترین کات و نەهێشتنی ئاستەنگ و کێشەکانی بەردەم پڕۆسەکە کردەوە، بە شێوەیەک کە لە بەرژەوەندی گشت هاووڵاتییانی هەرێمی کوردستان و عێراقدا بێت.
تەوەرێکی دیکەی گفتوگۆکانمان، تایبەت بوو بە سەرژمێریی گشتیی دانیشتووان لە عێراق، لەمبارەیەوە، هاوڕابووین لەسەر سەرخستنی پرۆسەکە بۆ مەبەستی گەشەپێدان، بە لەبەرچاوگرتنی تێبینییەکانی هەرێمی کوردستان لەم ڕووەوە.