رێبوار تەها بە پارێزگاری کەرکوک هەڵبژێردرا

نها نیوز - هەواڵەکان

میدیای یەکێتی رایگەیاند، رێبوار تەها بە پارێزگار و محەمەد حافز بە سەرۆکی ئەنجوومەنی پارێزگای کەرکوک هەڵبژێردران.

میدیای یەکێتی بڵاویکردەوە، كه‌مێك لەمەوپێش كۆبونه‌وه‌ی‌ ئەنجومەنی پارێزگای کەرکوک لەبەغدا دەستیپێکردو نۆ ئەندامی ئەنجومەن پێنج ئەندامی یەکێتی، دوو ئەندامی هاوپەیمانیی عەرەبی‌‌ و ئەندامێکی کریستیان تێیدا بەشدارن.

هاوکات محمد حافزیش لە پێکهاتەی عەرەبی بە سەرۆکی ئەنجومەنی پارێزگای کەرکوک هەڵبژێردرا.

کۆبوونەوەی ئەنجومەنی پارێزگای کەرکوک لە بەغدا بەرێوەچوو و تێیدا پۆستەکانی پارێزگار و سەرۆکی ئەنجوومەنی پارێزگای کەرکوک یەکلایی کرانەوە.

رۆژی 18ی 12ی 2023، هەڵبژاردنی ئەنجومەنی پارێزگاکانی عیراق و لەو چوارچێوەیەشدا هەڵبژاردنی ئەنجومەنی پارێزگای کەرکوک ئەنجامدرا، کە تێیدا هاوپەیمانی کەرکوک هێز و ئیرادەمانە کە لەنێوان یەکێتی و شیوعی بوو، لە کەرکوک زۆرترین دەنگی لەسەر ئاستی پارێزگاکە بەدەست هێنا و هێزی یەکەمی هەموو پێکهاتەکان بوو کە خاوەنی 157 هەزار و 639 دەنگە، کە دەکاتە %43 دەنگەکانی ئەو پارێزگایەو 5 کورسی بەدەستهێنا.

بەشێوەیەکی گشتیش لە کەرکوک لەکۆی سەرجەم لیست و قەوارە بەشدارەکان، کورد 242716 دەنگ واتە 7 کورسی و عەرەب 212089 دەنگ واتە 6 کورسی و تورکمان 97870 دەنگ واتە 2 کورسی و مەسیحی 1703 دەنگ واتە 1 کورسییان بەدەستهێنا، بەپێی ئیستحقاقی هەڵبژاردنیش پێکهاتەی کورد پۆستی پارێزگاری کەرکوکی بەرکەوت و پێکهاتەی عەرەب سەرۆکی ئەنجومەنی پارێزگای کەرکوکی بەرکەوت.