بەهای دۆلار بەشێوەیەکی بەرچاو بەرزبووەوە و هۆکارەکەی ئاشکراکرا

نها نیوز – هەواڵەکان

بەهاى دینار بەرامبەر دۆلارى ئەمریکى بەردەوامە لە دابەزین و بە وتەی وتەبێژى بازاڕى دراوى هەولێر، بەهۆى بارودۆخى سیاسییەوە بەهاى 100 دۆلار بگاتە خانەى 150 هەزار دینار.

کەیفی خۆشناو، وتەبێژی بازاڕی دراوی هەولێر لە لێدوانێکدا بە میدیای یەکێتی دەڵێت "ئێستا خواستێکی زۆر هەیە بۆ کڕینی دۆلار لە بازاڕەکاندا، بەهۆی بارودۆخی سیاسی هاونیشتمانییان هەوڵدەدەن پارەکانیان بکەنە دۆلار.

سەبارەت بە هۆکاری بەرزبوونەوەی دۆلار، ناوبراو ئاماژە بەوەش دەکات "یەکێک لە هۆکارە سەرەکییەکانی دابەزینی بەهای دینار، دەگەڕێتەوە بۆ ئەوەی جووتیارانی عێراق پارەی گەنمەکانیان بە دینار وەرگرتووە و ئەمەش وایکردووە دینارێکی زیاتر بچیتە نێو بازاڕەکانەوە، لەکاتێکدا بەشێکی زۆر لە مامەڵە و پارەدانەکان بە دۆلارە و هاوڵاتییان پارەکانیان دەکەن بە دۆلار.

کەیفی هۆکارێکی دیکە دەخاتە روو و دەڵێت "رێژەی خستنەڕووی پارەی کاش لەلایەن بانکی ناوەندییەوە رۆژانە زۆر کەمە، ئەگەر 30 ملیۆن دۆلاریش بخاتە بازاڕەوە خواستی 18 پارێزگای عێراق پڕناکاتەوە، ئەمەش پاش ئەوە دێت لە رۆژانی جەژن 12 رۆژ بانکەکە پشووی هەبووە و گەشتیاریش لەوکاتەدا زۆرترین خواستی هەبووە.

وتەبێژەکەی بازاڕی دراوی هەولێر پێشبینی دەکات، ئەگەر بارودۆخی سیاسیی بەتایبەت لەبارەی لوبنان و ئیسرائیلەوە بەرەو خراپی بڕوات، ئەوا کاریگەریی لەسەر دراوی عێراقی دەبێت و زیاتر بەهاکەی دادەبەزێت و رەنگە بگاتە خانەی 150 هەزار دینار بۆ هەر 100 دۆلارێک.