نها نیوز – هەواڵەکان
فرۆشیارێکی نەوتی ماڵان لەبارەی نرخی نەوتی سپی لە بازاڕی رەشدا رایدەگەیەنێت، ئێستا نەوتی سپی بەرمیلی بە 130 هەزارە، مەرجیش نییە تا پایز نرخەکەی دادەبەزێت. شارەزایەکی بواری نەوتیش دەڵێت "پێشبینی دەکەم نرخی نەوتی سپی لە زستاندا بگاتە 150 بۆ 160 هەزار دینار".
ساڵانە لە وەرزی هاویندا، نرخی نەوت دابەزین بەخۆوە دەبینێت، بەهۆی ئەوەی خواستی زۆری لەسەر نییە، بەڵام لە هاوینی ساڵی 2022ـدا نرخی نەوتی سپی بەشێوەیەکی بەرچاو بەرزبووەوە، بەجۆرێک نرخی هەر بەرمیلێک گەیشتە 260 هەزار دینار.
نها بۆ دەستکەوتنی زانیاری لەبارەی نرخی یەک بەرمیل نەوتی سپی ماڵان لە ئێستای وەرزی هاوین عوسمان مەحمود، فرۆشیاری نەوت لە بازاڕی ڕەش دەدوێنێت و ناوبراو دەڵێت "ئێستا نەوتی سپی بەرمیلی بە 130 هەزارە، مەرجیش نییە تا پایز نرخەکەی بەرزببێتەوە، ڕەنگە تەنانەت داشببەزێت.
بەوتەی ئەو فرۆشیاری نەوتە بێت، نەوتەکەیان بەو مەرجە دەکڕن کە نەوتی بەغدایە و وەک خۆی دەڵێت، نەوتەکەی بەغدا "نەوتێکی باشە.
ناوبراو ئەوەش ئاشکرا دەکات "ئەو نەوتەی رەنگەکەی زەردە لە بازاڕ نرخی کەمترە بەراورد بەو نەوتەی رەنگی سپییە.
هاوکات بەهجەت ئەحمەد، شارەزای بواری نەوت لە لێدوانێکی تایبەتدا بە نها نیوز دەڵێت، لە بازاڕی رەش "ئێستا بەرمیلێک نەوت بە 120 بۆ 130 هەزار دینارە، چونکە ئێستا وەرزی نەوت نییە و هەمان نرخی ساڵانی رابردووە، پێشبینی دەکەم 150 بۆ 160 هەزار بێت لە زستاندا و لەوە تێپەڕ نابێت.
نها نیوز لە بەدواداچونەکانیدا زانیاری دڵخۆشکەری دەست دەکەوێت سەبارەت بە نرخی بەرمیلێک نەوتی سپی بۆ زستان کە نرخەکە هاوشێوەی ساڵی 2022 بەرزنابێتەوە، لەوبارەیەوە وریا حسێن بە نها نیوزی راگەیاند "نرخی نەوتی جیهانیی جێگیر بێت و لە 80 دۆلار نەیەتە خوارەوە، لە هەرێمی کوردستانیش هاوشێوەی ساڵی رابردوو لە نێوان 150 بۆ 170 هەزار دینار دەبێت، مەگەر گۆڕانکارییەکی گەورەی جیهانیی ڕووبدات.