داواده‌كرێت دوو وڵات هێرشێكى فراوان بكه‌نه‌سه‌ر كوردستان
نها نیوز ـ هه‌واڵه‌كان
سەرۆکی پارتی نه‌ژادپه‌رستى توركیا ناسراو به(مەهەپە) داواكاریه‌كى به‌په‌له ئاراسته‌ى هه‌ردوو ده‌وڵه‌تى توركیا و سوریا ده‌كات و ده‌ڵێت:"پێویسته ئه‌و دوو وڵاته هێرشێكى فراوان بكه‌نه‌سه‌ر ڕۆژئاواى كوردستان"، راشیده‌گه‌یه‌نێت:"نابێت رێگە بدرێ ئیدارەی بەڕێوبەرایەتیی خۆسەر لە رۆژئاڤای کوردستان لە رێگەی هەڵبژاردنی شارەوانییەکانەوە پێگەی خۆی بەهێز بکات".
دەوڵەت باخچەلی سەرۆکی مەهەپە لە کۆبوونەوەی فراکسیۆنی حزبه‌كه‌ى لە پەرلەمانى توركیا په‌یامێكى بڵاوكرده‌وه و رایگه‌یاند:"ئیدارەی ئەمریکا یارییەکی نوێ ده‌كات لەگەڵ رێکخراوی بەرەی پەکەکە کە هێزەکانی سووریای دیموکراتە لە باکووری رۆژهەڵاتی سووریا".
له‌و په‌یامه‌یدا باخچه‌لى وتوویه‌تى:"بەسوود وەرگرتن لە ژینگەی پشێوی رۆژهەڵاتی ناوەڕاست؛ هەڵبژاردنی بەناو خۆجێی لە 11ی حوزەیران بەڕێوەدەچێت بۆ دیاریکردنی 133 حکومەتی خۆجێی کە باکووری رۆژهەڵاتی سووریا دەگرێتەوە، بەتایبەتی تەبقە، عەفرین، دێرەزۆر، رەقە، مه‌نبه‌ج و جزیرە، ئەم هەوڵە بۆ دیموکراسی و هەڵبژاردنی نایاسایی بە مانای قۆناغێکی نوێ لە دابەشکردنی سووریا دێت، هەروەها ئەو لێدوانەی ئەنجوومەنی نیشتیمانی کوردی سووریا کە دان بەو هەڵبژاردنانەدا نانێت و رایانگەیاندووە بایکۆتی دەکەن، پێویستە هەڵسەنگاندنی بۆ بکرێت".
سه‌رۆكى پارتى نه‌ژادپه‌رستى توركیا ته‌ئكید ده‌كاته‌وه، "نابێت تورکیا رێگە بدات ئەو ناوچانەی ئێستا لە ژێر کۆنترۆڵی بەڕێوەبەرایەتی خۆسەرن، لە ژێر دەسەڵاتی ئیدارەی کوردی بمێننەوە، لەو چوارچێوەیەدا پێشنیاز ده‌كه‌م بۆ ئەنكەرە و دیمەشق و هاوكارییان ده‌كه‌م بۆ ئەنجامدانی ئۆپەراسیۆنێکی سەربازیی هاوبەش بۆ سەر رۆژئاڤای کوردستان".
|