لێكۆڵینه‌وه‌یه‌ك: ڤایرۆسی كۆرۆنا له‌نێو تۆوی پیاواندا ده‌مێنێته‌وه
.jpg)
ئاژانسی نها...
لێکۆڵینەوەیەکی چینی دەریخستووە کە ڤایرۆسی کۆرۆنا دەتوانێت لەنێو تۆوی پیاواندا بـمێنێتەوە تەنانەت دوای ئەوەی کە دەست بە چاکبوونەوە دەکەن، ئەمەش پرسیاری ئەوەی بەدوای خۆیدا هێناوە کە ئایا ڤایرۆسەکە لە رێگەی پەیوەندی سێکیسییەوە دەگوازرێتەوە یان نا.
لێکۆڵینەوەکە لەسەر 38 پیاوی تووشبووی ڤایرۆسەکە لە نەخۆشخانەیەکی چین ئەنجامدراوە و ئەنجامەکان دەریدەخەن کە ڤایرۆسی کۆرۆنا لە نێو تۆوی 16%ـیاندا ماوەتەوە.
توێژەران ئاماژە بەوە دەکەن کە هەرچەندە ڤایرۆسەکە ناتوانێت لەنێو تۆودا خۆی زیادبکات، بەڵام بە کارایی دەمێنێتەوە.
پێشتریش لێکۆڵینەوەکان دەریانخستبوو کە هەریەکە لە ڤایرۆسەکانی ئیبۆلا و زیکاش بەهەمان شێوە لەنێو تۆوی ئەو تووشبووانەدا دەمێنێتەوە کە چاکبوونەتەوە.
توێژەران ئاماژەیان بەوەکردووە کە وێڕای هەبوونی ڤایرۆس لەنێو تۆودا، مەرج نییە لە رێگەی پەیوەندی سێکسییەوە بگوازرێتەوە، بەڵام هۆشداریشدەدەن کە ئەگەر بێت و لێکۆڵینەوەکانی داهاتوو بیسەلمێنن کە لەرێگەی ئەو جۆرە پەیوەندییەوە توانای گواستنەوەی دەبێت، ئەوا دەبێت گرنگی زۆر بە سێکسی پارێزراو بدرێت، واتە دەبێت لە کاتی ئەنجامدانی سێکس کۆندۆم بەکاربهێنرێت.
|