بانكی ناوەندی: چاپكردنی پارەی كاش كەمدەبێتەوە
نها نیوز- هەواڵەکان
بانكی ناوەندی عێراق پێشبینیدەكات لە چەند ساڵی داهاتوودا لەدوای پشتبەستنی زیاتری هاووڵاتییان بەسیستمی پارەدانی ئەلیكترۆنی، چاپكردنی پارەی كاش لەعێراق كەمببێتەوە.
زەید حەمید رەشید بەڕێوەبەر لەبەشی تەكنەلۆجیا و زانیاری بانكی ناوەند لە لێدوانێكی رۆژنامەوانیدا رایگەیاند "ئامادەكاركردنی ژێرخانی پێویست بۆ سیستمی پارەدانی ئەلیكترۆنی، لە فەرمانگە حكومییەكاندا بەسستی بەڕێوەدەچێت، بەهۆی نەبوونی سیستمێكی تایبەت و پێشكەوتوو، لەنێوان بانكی ناوەندیی و بانكەكاندا".
ئەوەشی خستەڕوو "لەئێستادا بەهەماهەنگی لەگەڵ بانكەكان كاردەكەن بۆ چارەسەركردنی ئەو كێشە و ئاستەنگییانەی لەبەردەم سیستمی پارەدانی ئەلیكترۆنیدان و پێداچوونەوە بە سیستەمەكەدا، كە بەشێوەیەكی گشتی سوودی ستراتیژی بۆ دەوڵەتی عێراق دەبێت".
ئەو بەڕێوەبەرە بانكی ناوەندیی ئەوەشی راگەیاند " لەچەند ساڵی داهاتوودا بەهۆی بەرەوپێشچوونی سیستمی پارەدانی ئەلیكترۆنی لە عێراق و پشتبەستنی زیاتری هاووڵاتییان بە سیستەمەكە، چاپكردنی پارەی كاش لە عێراق كەمببێتەوە".
|