ئەگەری هەیە پەیڕەویکردنی سیستمێکی خۆراکی یارمەتییت بدات لە مامەڵەکردن لە گۆڕانکارییە هۆڕمۆنییەکان، لەو ڕووەوە هەندێک خۆراک هەن کە دەتوانن ئازارەکانی سوڕی مانگانە کەمبکەنەوە و چەند جۆرێکی خواردنیش کە ئازارەکان خراپتر دەکەن.
لە بابەتێکی تەندروستییدا ماڵپەڕی ئەلجەزیرە بڵاویکردووەتەوە، پسپۆڕێکی خۆراک و تەندروستیی ئافرەتان بە ناوی مارتا لیۆن باسی لەوە کردووە، لە هەموو سێ ئافرەتدا، یەکێکیان تووشی گرفتی تەندروستیی و ئازار دەبێت لە کاتی گۆڕانکاریی هۆڕمۆنیدا و خواردنی هەندێک جۆری خۆراک ئەگەری هەیە چارەسەر بێت بۆ ئەو گرفتە تەندروستییانە.
مارتا لیۆن ئاماژەی بە چەند جۆرێکی خۆراک کردووە کە بۆ کەمکردنەوەی ئازارەکانی سوڕی مانگانەی ئافرەتان بەسوودن، لەوانە:
-ئەو خۆراکانەی دەوڵەمەندن بە ئاسن وەک سپێناخ و پاقلەمەنییەکان.
-کالیسیۆم، مەگنیسیۆم و پۆتاسیۆم، وەک مۆز، سپێناخ و ئەنەناس.
-ئەو خۆراکانەی دەوڵەمەندن بە دژە-هەوکردنەکان، سەوزەوات و میوەکان بە گشتی.
-گۆشتی ماسی و میوە وشککراوەکان.
-ئەو خۆراکانەی دەوڵەمەندن بە ڕیشاڵ.
-خواردنەوەی ئاوی پێویست.
هەروەها باسی لە هەندێک جۆری خۆراک کردووە کە واباشە ئافرەتان خۆیان لێیان بەدووربگرن، لەوانە:
-خوێ، کافایین و بەرهەمەکانی شەکر.
-چەورییە چڕبووەکان، پێکهاتە خۆراکییە دەستکردەکان و خواردنەوە گازییەکان.
-بەرهەمەکانی دانەوێڵە وەک سەمون و نانی سپی.