نها نیوز - هەواڵەکان
شیعەكان گەیشتنە ئەو بڕوایەی پێداگریكردن لەسەر یاسای حەشدی شەعبی خزمەت بە عێراق ناكات و بریاری داوە، ئەو رێوشوێنانە بوەستێنێت کە بابەتی ناکۆکی توند بوون لەگەڵ واشنتۆن.
رۆژنامەی "الشرق الاوسط" لە راپۆرتێکدا بڵاوی کردەوە، هاوپەیمانی دەسەڵاتداری عێراق بڕیاریدا یاسای دەستەی حەشدی شەعبی رابگرێت و بڕیاردان لە چارەنوسی هێزەکانی دوابخات، لە چاوەڕوانی چارەسەری ململانێکان لە لوبنان لەبارەی چەکداماڵینی حزبوڵا.
رۆژنامەکە نووسیویەتی، سەرکردەیەک لە چوارچێوەی هەماهەنگی لە کۆبونەوەیەکی ئەم دواییەدا، بڕیاریدا ئەو رێوشوێنانە بوەستێنێت کە بابەتی ناکۆکی توند بوون لەگەڵ واشنتۆن، ئەو سەرکردەیە لەبارەی کۆبونەوەکە دەشڵێت "سەرکردەکانی هاوپەیمانێتیەكە گەیشتونەتە ئەو بڕوایەی دەرکردنی یاسای حەشدی شەعبی خزمەت بە بەرژەوەندییەکانی وڵات ناکات.
رۆژنامەک ئاماژە بەوەدەکات، یەکێک لە سەرکردەکانی هاوپەیمانییەکە رایگەیاندوە، ئەو ئاماژانەی لە واشنتۆنەوە دێن جێگەی نیگەرانین و پێویستی بە پەلەنەكردن هەیە، راوێژکارێکی دیاری حزبیش کە لەم دواییانەدا بەشداری گفتوگۆکانی سەبارەت بە چارەنوسی یاساکە کردبوو،رایگەیاندووە،حکومەت رێوشوێنی جێگرەوە ناگرێتەبەر و بەرگەی لێكەوتە چاوەڕوانکراوەكانی ناگرێت.
هاوپەیمانی دەسەڵاتدارانی عێراق، هەنگاوی داهاتووی بۆ یەكلاكردنەوەی چارەنوسی چەکدارانی حەشدی شەعبی گرێداوە بە دەرئەنجامی ململانێکان لەسەر چارەنوسی چەكی حزبوڵا، كە بە وتەی ئەو سەرکردەیە، هەموو شتێک بەندە بەوەوە کە ئایا حزبوڵا توانای دووبارە خۆ رێكخستنەوەی هەیە، بە چەک یان بەبێ چەک.
حەشدی شەعبی، کە هێزێکی چەکداریی سەر بە دەوڵەتی عێراقە و لە دەیان گرووپی جۆراوجۆر پێکدێت. ئەم هێزە لە ساڵی ٢٠١٤ و لە دوای فەتوایەکی عەلی سیستانی، مەرجەعی باڵای شیعەکانی عێراق، بۆ بەرەنگاربوونەوەی ڕێکخراوی داعش دامەزراوەو لەساڵی 2016 دا بەیاسا بونە هێزی فەرمی عێراق و بودجەی ئەم هێزە ساڵانە بەبەردەوامی زیاد دەکات، بەڕادەیەک لەبودجەى 2023 دا (12%)ـى بودجەى هەموو عێراقیان بۆ دابینکراوە کە دەکاتە نزیکەى بودجەى هەموو هەرێمی کوردستان.