بڕیاری کشاندنەوەی پڕۆژەیاسای حەشدی شەعبی درا
نهانیوز-هەواڵەکان
ڕاوێژکاری یاسایی سەرۆکی پەرلەمانی عێراق ئاشکرایکرد، سوودانی لە دوایین کۆبونەوەی چوارچێوەی هەماهەنگیدا، بڕیاری کشاندنەوەی پڕۆژەیاسای حەشدی شەعبی دا.
ئیبراهیم دلێمی ڕاوێژکاری یاسایی سەرۆکی پەرلەمانی عێراق، رایگەیاند، لەدوایین کۆبونەوەی چوارچێوەی هەماهەنگی, سودانی بەئەندامانی چوارچێوەکەی وتوە، ئەگەر پڕۆژەیاسای حەشدی شەعبی نەکشێنینەوە، ڕوبەڕوی سزای قورسی ئەمریکا دەبینەوەو عێراق وێراندەبێت.
ئەو ڕاوێژکارەی سەرۆکی پەرلەمان وتیشی، "هەڕەشەکانی ئەمریکا بۆسەر عێراق لەئەگەری دەنگدان لەسەر ئەو پڕۆژەیاسایە زۆر جدین، تەنها لەڕێگەی ئابورییشەوە ئەمریکا توانای ئیفلیجکردنی عێراقی هەیە".
مەهدی کەعبی ئەندامی مەکتەبی سیاسیی بزوتنەوەی نوجەبا هەواڵی کشانەوەی پڕۆژەیاساکەی بۆ میدیا عێراقیەکان پشتڕاستکردەوەو ڕایگەیاند، "کشاندنەوەی پڕۆژەیاساکە لەلایەن حکومەتەوە بوە، هۆکارەکەشی بۆ ئەو فشارە زۆرو بەردەوامانەی ئەمریکا دەگەڕێتەوە".
لەگەڵ نزیکبوونەوەی وادەی هەڵبژاردنی پەرلەمانی عێراق کە بڕیارە لە مانگی تشرینی دووەمی ئەمساڵ بەڕێوەبچێت، دەستەی حەشدی شەعبی لە چوارچێوەی دامەزراوە ئەمنی و سەربازییەانی عێراقدا سەرەڕای هۆشدارییەکانی ئەمەریکا،هەوڵی بەدەستهێنانی شەرعییەتێکی تەواو یاسایی دەدات و چەندجارێک خرایە کارنامەی پەرلەمانەوە بۆ دەنگدان بەڵام دوای نارەزایەتیی و فشارێکی زۆر سوودانی پرۆژە یاساکەی کشاندەوە.
|