نها نیوز – هەواڵەکان
وەزارەتی نەوتی عێراق رایگەیاند، هەواڵی بەقاچاخبردنی نەوتی رەش رەتدەکەینەوە ئەوەیش زیان بە ناوبانگی دەوڵەتەکەمان دەگەیەنێت.
ئەمڕۆ دوشەممە، وەزارەتی نەوتی عێراق لەبارەی راپۆرتێكی رۆژنامەی "الصباح الجدید" رونکردنەوەیەکی بڵاوکردەوە و تیایدا هاتووە "سەرسوڕمانی خۆی دەردەبڕی لە بڵاوكردنەوەی زانیاری نادروست و چەواشەکارانە سەبارەت بە پرۆسەی هەناردەکردنی نەوتی رەش".
وەزارەتەكە ئاماژەی بەوەشداوە، سەرجەم کارەکانی بە بازاڕکردن و هەناردەکردنی نەوتی رەش پابەندە بە سیستمێکی رێکخراوی ورد و گشتگیر، بە سەرپەرشتی راستەوخۆی کۆمپانیای بە بازاڕکردنی نەوت، بەپێی گرێبەستە فەرمییە راگەیەندراوەکان و بەهەماهەنگی لەگەڵ باڵاترین دەسەڵاتی چاودێری لە وڵات، لە دیوانی چاودێری دارایی، دەستەی دەستپاکی، دەستەی گشتی گومرگ، دەزگا ئەنیەكان بەڕێوەدەچن".
ئەوەش هاتووە "باسکردن لە "نەوتهەڵگری نەناسراو" یان تۆڕی قاچاخ، "بوختانێکی مەترسیدار و چەواشەکارانەیە، ئەم نەوتهەڵگرانە بە نەوتهەڵگری نەناسراو لەلایەن وەزارەتەکەمان وەسف کراون و لەوانەیە هی کارگە یان وەزارەتەکانی تر بن، بەندەرەکانی عێراق لەچوارچێوەی سیستەمێکی چاودێری تونددا کاردەکەن، کە رێگە بە تێپەڕبونی هیچ بارێک نادات بەبێ رەزامەندی فەرمی و بەڵگەدار لەلایەن لایەنە پەیوەندیدارەکانەوە".
بەبڕوای وەزارەتەكە، كێشكردنی دامەزراوەکانی دەوڵەت لە بانگەشەكانی قاچاخچێتی بەبێ هیچ بەڵگەیەک، "ناوزڕاندنێكی ئاشكرای قبوڵنەکراو و مەترسیدارە، زیانی راستەوخۆ بە ناوبانگی دەوڵەتی عێراق و دامەزراوە سەروەرەکانی دەگەیەنێت، ئاسایشی ئابوری نیشتمانی دەخاتە بەردەم هەڕەشەی جدی."
وەزارەتی نەوەتی عێراق ئەوەشێ رونکردووەتەوە، ئەوان درێغی ناكەن لە پاراستنی ناوبانگ و پێگەی یاسایی خۆیان و رێکاری یاسایی توند بەرامبەر ئەو کەس و قەوارانە دەگرنەبەر، کە پەرە بەو تۆمەتە درۆیانە دەدەن.
ئەوەش خراوەتە روو، ئەوان پێشوازی لەهەر زانیارییەکی بەڵگەدارو هاوپێچكراو بە بەڵگە دەکەن لەهەر سەرچاوەیەکەوە بێت".