لیژنه‌ی دارایی په‌رله‌مان: لێپرسینه‌وه له وەزیری دارایی عێراق ناکرێت
نها نیوز – هەواڵەکان
ئه‌ندامێکی لیژنه‌ی دارایی له ئه‌نجومه‌نی نوێنه‌رانی عێراق لە سەر لێپرسینەوە لە تەیف سامی هاتە دەنگ و دەڵێت، " ئه‌وه‌ی ئێستا ڕوده‌دات ده‌كه‌وێته چوارچێوه‌ی چاودێری په‌رله‌مانه‌وه نه‌ك لێپرسینه‌وه‌ی سیاسی.
ئه‌مڕۆ سێشه‌ممه 5 ی ئابی 2025 ئه‌میر مه‌عموری ئه‌ندامی لیژنه‌ی دارایی له ئه‌نجومه‌نی نوێنه‌رانی عێراق، له‌لێدوانێكی رۆژنامه‌وانیدا ڕه‌تیكرده‌وه، لێپرسینه‌وه له ته‌یف سامی وه‌زیری دارایی بكرێت و راشیگه‌یاند، ئه‌وه‌ی پێشكه‌شكرا "پرسیارێكی زاره‌كی فه‌رمییه" كه به واژۆی ژماره‌یه‌ك په‌رله‌مان ئاڕاسته‌ی كراوه له چوارچێوه‌ی ده‌ستوری دامه‌زراودا، ئامانجیش گفتوگۆكردنه له‌سه‌ر ئه‌و دۆسیه داراییانه‌ی كه ڕاسته‌وخۆ كاریگه‌رییان له‌سه‌ر ژیانی هاوڵاتیان هه‌یه.
ئه‌میر مه‌عموری راشیگه‌یاند، "ژماره‌یه‌ك په‌رله‌مانتار واژۆی فه‌رمییان كۆكردۆته‌وه بۆ ئه‌وه‌ی له ناوخۆی په‌رله‌مان پرسیارێكی زاره‌كی پێشكه‌ش به ته‌یف سامی پێشكه‌ش بكه‌ن، پرسیاره‌كه‌ش باس له چه‌ند ته‌وه‌رێكی گرنگ ده‌كات، دیارترینیان دواكه‌وتنی ناردنی خشته‌ی بودجه سه‌ره‌ڕای سه‌ره‌تای مانگی (ئاب/8)، هه‌روه‌ها دواكه‌وتنی خه‌رجكردن و دابینكردنی داراییه، به‌تایبه‌تی موچه‌ی خانه‌نشینان، جگه له‌و ڕێكارانه‌ی په‌یڕه‌و ده‌كرێن بۆ ده‌سته‌به‌ركردنی موچه‌ی گشتی موچه‌خۆران".
جەختیشیکردەوە، "داواكارییه‌كه له‌گه‌ڵ واژۆكان، به فه‌رمی پێشكه‌شی سه‌رۆكی ئه‌نجومه‌نی نوێنه‌ران كراون، بابه‌ته‌كه ناچێته خانه‌ی لێپرسینه‌وه، به‌ڵكو ڕێكارێكی چاودێری شه‌رعی پێكده‌هێنێت كه ئامانج لێی وروژاندنی پرسیاری تایبه‌ته سه‌باره‌ت به دۆسیه داراییه‌كانی په‌یوه‌ست به مافه‌كانی هاوڵاتیان".
هه‌ندێك له ده‌زگاكانی ڕاگه‌یاندن و سۆشیال میدیا بڵاویانكرده‌وه، په‌رله‌مان لێپرسینه‌وه له ته‌یف سامی وه‌زیری دارایی ده‌كات، ئه‌مه‌ش ناڕه‌زایه‌تییه‌كی به‌رفراوانی سیاسی به‌دوای خۆیدا هێنا، به‌تایبه‌تی له‌به‌ر ڕۆشنایی دواكه‌وتنی خه‌رجكردن و په‌ره‌سه‌ندنی فشاری گشتی له‌سه‌ر خانه‌نشینی و یارمه‌تییه‌كان، به‌ڵام په‌رله‌مانتاران جه‌ختیانكرده‌وه كه ئه‌وه‌ی ئێستا ڕوده‌دات ده‌كه‌وێته چوارچێوه‌ی چاودێری په‌رله‌مانه‌وه نه‌ك لێپرسینه‌وه‌ی سیاسی
|