ئەمریکا پەیامێکی تووند بە عێراق دەدات
نهانیوز-هەواڵەکان
ئەمەریکا لە بەغداد هۆشداری بە عێراق دەدات لەبارەی تێپەڕاندنی یاسای حەشدی شەعبی، دەڵێت: تێپەڕاندنی یاساکە گروپەچەکدارەکان بەهێزتر دەکا، لای خۆشییەوە سەرۆکی دەستەی حەشدی شەعبی داوا لە پەرلەمانتارانی عێراق دەكات یاسایی حەشدی شەعبی تێپەڕێنن.
باڵیۆزخانەی ئەمەریکا لە بەیاننامەیەکدا، جارێكی تر نیگەرانی خۆی سەبارەت بە تێپەڕاندنی یاسای حەشدی شەعبی دووپات دەكاتەوە.
بەپێی بەیاننامەکە، ستیڤن فەیگن، هەڵسوڕێنەری كارەكانی باڵیۆزخانەكە لە میانی کۆبونەوەی لەگەڵ موحسین مەندەلاوی، جێگری یەکەمی سەرۆکی پەرلەمانی عێراق، تاوتوێی ئەو بابەتەی کردوەو، نیگەرانی بەردەوامی ئەمریکای سەبارەت بە یاساکە دەربڕیوە.
ئاماژە بەوەشكراوە، فەیگن جارێكی تر قسەكانی مارکۆ رۆبیو، وەزیری دەرەوەی ئەمریکا دوپاتکردەوە، کە یاسای حەشدی شەعبی، هەژمونی ئێران بە دامەزراوەیی دەكات و گروپە تیرۆریستییە چەکدارەکان بەهێزتر دەکات، ئەوەش هەڕەشە لە سەروەری عێراق دەکات.
لای خۆشییەوە فەیاز، لە پەیامێكدا کە ئاڕاستەی ئەندامانی ئەنجومەنی نوێنەرانی کردووە، رایگەیاند" لە ساتێکدا کە ماناکانی وەفاداری و مێژوو بەرجەستە دەبن، لەبەردەم بەرپرسیارێتییەکی نیشتمانی دەوەستین، بابەتێک كە پەیوەندیدارە بە شكۆی ئەو کەسانەی چەکیان هەڵگرت بۆ بەرگریکردن لە عێراق و سەروەریەکەی".
دەشڵێت" دەنگدان لەسەر یاسای حەشدی شەعبی تەنیا رێکارێکی یاسایی نییە، بەڵکو دەربڕینی سوپاسگوزاری گەلە بۆ جەنگاوەرەكانی و، چەسپاندنی مافی ئەو کەسانەیە کە وەڵامی بانگەوازی مەرجەعییەتی ئایینییان دایەوەو، بە خوێنی خۆیان شکۆمەندی ئەم نیشتمانەیان نووسیوە".
|