نها نیوز – هەواڵەکان
دوای ئەوەیکە دوێنێ بەهۆی تەواونەبوونی رێژەی یاسایی ئامادەبوون دانیشتنی پەرلەمانی عێراق ئەنجام نەدرا، ئەمرۆش بەهۆی دواخستنی هەمواری یاسای زیندانیانی سیاسی و بوونی تێبینی لەسەر پرۆژە یاسای بیروڕا پەرلەمانتارانی کورد لە دانیشتنی ئەمرۆی ئەنجومەنی نوێنەران هاتنە دەرەوە و رێژەی یاساییان شکاند و نەتوانرا هیچ پڕۆژە یاسایەک دەنگی لەسەر بدرێت.
کاروان یاروەیس بڕیاردەرى فراکسیۆنى یەکێتى لە ئەنجومەنى نوێنەرانى عیراق لەبارەی دانیشتنی ئەمرۆی پەرلەمانی عێراق تایبەت بە نهانیوزی راگەیاند، بەهۆی دواخستنی هەمواری یاسای زیندانیانی سیاسی و بوونی تێبینیمان لەسەر پرۆژە یاسای ئازادی بیرورا و رێکخستنی خۆپیشاندان ، پەرلەمانتارانی کورد نسابی دانیشتنی ئەمرۆی پەرلەمانی عێراقیان شکاند.
کاروان یاروایس دەشڵێت "مادەی یەک بڕگەی (ز) هەمواری یاسای زیندانیانی سیاسی لەبەرژەوەندی کەسوکاری سەربەرزی شەهیدانی هەڵەبجە و ئەنفالکراوان بوو، پرۆژەیاسای ئازادی بیرورا و رێکخستنی خۆپیشاندانەکان ئازادییەکان لەعێراق بەرتەسک دەکاتەوە".
ئاماژەی بەوەشکرد، بەهۆی هاتنە دەرەوەی پەرلەمانتارانی کورد لە دانیشتنەکە رێژەی یاسایی شکا و نەتوانرا دەنگ لەسەر هەموارکردنەوەی هیچ پڕۆژە یاسایەک بدرێت".
پەرلەمانتارەکەی یەکێتی وتیشی " یەکێکی دیکە لەو هۆکارانەی پەرلەمانتارانی کورد بایکۆتی دانیشتنەکەیان لەسەر کرد، پرسی هەموواری پڕۆژە یاسای ئازادی بیروڕاو رێکخستنی خۆپیشاندان بوو لە عیراق، چونکە وەک کورد تێبینی زۆرمان لەسەر هەموواری پرۆژەکە هەیە و پێویستە گۆڕانکاری تێدا بکرێت".