نها نیوز – هەواڵەکان
سه‌رۆك وه‌زیرانی عێراق، رایگەیاند، هێرشی فڕۆکە بێفڕۆکەوانەكان بۆ سەر کێڵگە نەوتییەکانی هەرێم کردەوەی تیرۆریستین و لە گەڵ به‌رپرسانی هه‌رێم و هاوپه‌یمانان كار بۆ ده‌ستنیشانكردنی به‌رپرسیارانی هێرشه درۆنیه‌كانی سه‌ر هه‌رێمی كوردستان ده‌كه‌ین.
محه‌مه‌د شیاع سودانی سه‌رۆك وه‌زیرانی عێراق له چاوپێكه‌وتنێكدا له‌گه‌ڵ ئاژانسی" ئه‌سۆشێتد پرێس" سه‌باره‌ت به هێرشه درۆنیه‌كانی سه‌ر هه‌رێمی كوردستان رایگەیاند، "ئەو هێرشانە تیرۆرستین.
هەروەها دەشڵێت " له‌باره‌ی هێرشه درۆنیه‌كانه‌وه لیژنه‌مان پێكهێناوه و حكومه‌تی فیدڕاڵی عێراق له‌گه‌ڵ ده‌سه‌ڵاتدارانی هه‌رێم و هێزه‌كانی هاوپه‌یمانان كارده‌كات بۆ ده‌ستنیشانكردنی ئه‌و كه‌سانه‌ی به‌رپرسیارن و لێپرسینه‌وه‌یان له‌گه‌ڵدا بكه‌ن".
سەرۆکوەزیران ئاشکراشیکرد، ئێمه ڕێگریمان له زیاتر له 29 هه‌وڵی هه‌ڵدانی موشه‌ك و فڕۆكه‌ی بێفڕۆكه‌وان له ناوخۆی عێراقه‌وه كرد، جەختیشیکردەوە، رێگه به هیچ تاك و قه‌واره‌یه‌ك ناده‌ین عێراق وه‌ك بنكه‌یه‌ك بۆ ئۆپه‌راسیۆنه سه‌ربازییه‌كان به‌كاربهێنێت.
سوودانی وتیشی"ڕێگری له هه‌ر لایه‌نێك ده‌كه‌ین كه پاساو دروستبكات بۆئه‌وه‌ی عێراق بكاته ئامانج یان رایكێشێته ناو شه‌ڕه‌كانه‌وه".
سه‌باره‌ت به دانوستانه‌كانی واشنتن و ئێران، سوودانی هەڵوێستی خۆی راگەیاند و وتی، "هیوادارین دانوستانه ئه‌تۆمییه‌كانی نێوان ئێران و ئه‌مریكا ده‌ستپێبكه‌نه‌وه.
له‌باره‌ی دۆخی سوریاوه‌شەوە، ئاماژه‌ی به‌وه‌كرد، سوریا وڵاتێكی گرنگه بۆ ئاسایشی عێراق، ئێمه‌ش حه‌ز ده‌كه‌ین به یه‌كگرتویی بمێنێته‌وه.