کۆبوونەوەیەکی تایبەت بۆ هەڵبژاردنی پارێزگارێکی نوێ بۆ بەغدا بەرێوە دەچێت

دوای خانەنشین کردنی پارێزگاری پێشوو، ئەنجومەنی پارێزگای بەغدا ئێوارەی ئەمڕۆ کۆبوونەوەیەکی تایبەت بۆ هەڵبژاردنی پارێزگارێکی نوێ بۆ بەغدا ئەنجام دەدات سوودانی و مالیکیش بۆ دانانی  بەربژێرەکانیان ململانێ شاراوەکانیان چر کردۆتەوە.

ئەنجومەنی پارێزگای بەغدا ئێوارەی ئەمڕۆ یەکشەممە، دانیشتنێکی تایبەت بۆ هەڵبژاردنی پارێزگارێکی نوێ سازدەکات، لە کاتێکدا ململانێ لە نێوان بەربژێرانی محەمەد شیاع سودانی، سەرۆك وەزیران و نوری مالیکی، سەرۆکی هاوپەیمانیی دەوڵەتی یاسا بۆ بەدەستهێنانی ئەو پۆستە چڕبوەتەوە.

بەگوێرەی سەرچاوەیەكی سیاسی كە قسەی بۆ میدیا عێراقیەكان كردوە، کێبڕکێی ئێستا لە نێوان بەربژێری هاوپەیمانیی دەوڵەتی یاسا بە سەرۆکایەتی نوری مالیکی، و بەربژێری گەشەپێدان و ئاوەدانکردنەوە بە سەرۆکایەتی محەممەد شیاع سودانییە.

ئەو سەرچاوەیە ئاماژە بەوەش دەکات، بەربژێری مالیکی بۆ ئەم پۆستە عەتوان عەتوانیی، سەرۆکی لیژنەی دارایی پەرلەمانی عێراقە، بەڵام بەربژێرەکەی سودانیش، زولفەقار سامر فەیاز، ئەندامی ئەنجومەنی پارێزگایە.

ئەوە لەكاتێكدایە 20ی ئەم مانگە ئەنجومەنی پارێزگای بەغدا، بۆ جاری دوەم لە ماوەی کەمتر لە شەش مانگدا، دەنگی دا بە خانەنشینکردنی عەبدولموتەلیب عەلەوی، پارێزگاری بەغدا. دوێنێش د.لەتیف جەمال ڕەشید، سەرۆک کۆماری عێراق واژۆی لەسەر خانەنشینکردنی پارێزگاری بەغدا کرد.