کاردەکرێت بۆ قەدەغەکردنی تیک تۆک لە عێراق
نها نیوز – هەواڵەکان
وەزیری پەیوەندییەکانی عێراق داواکارییەکی فەرمی پێشکەش بە ئەنجومەنی نوێنەران کردووە بۆ دەرکردنی بڕیارنامەیەک بۆ قەدەغەکردنی ئەپی تیک تۆک.
ئەمڕۆ شەممە، 5ـی نیسانی، 2025، هەیام یاسری، وەزیری پەیوەندییەکانی عێراق لە چاوپێکەوتنێکی ڕۆژنامەوانیدا ڕایگەیاندووە، یەکێک لە ئەولەویەتیە سەرەکیەکانیان لە ساڵی 2025دا تەواوکردنی مۆڵەتی نیشتمانییە بۆ مۆبایلەکان بە تەکنەلۆژیای نەوەی پێنجەم، هەروەها بڵاوکردنەوەی کێبڵی بینایی و گەیاندنی بە زۆرترین ژمارەی بەکارهێنەران بۆ باشترکردنی خزمەتگوزاری ئینتەرنێت، و دەستبەرداربوون لە خزمەتگوزاری وای فای.
ئاماژەی بەوەشکردووە، کارکردن بۆ چالاککردنی پڕۆژەکانی ترانزێت و کێبڵی بینایی وایکردووە وڵاتانی نێودەوڵەتی و کۆمپانیا گەورەکانی نێودەوڵەتی خۆیان دابنێن لەسەر کۆریدۆری عێراق.
وەزیری پەیوەندییەکان دووپاتیکردووەتەوە، داواکارییەکی فەرمی پێشکەشکرا (پێشتر) بۆ قەدەغەکردنی ئەپی تیک تۆک، دوای ئەوەی بە هەزاران بانگەوازی زۆرینەی خێزانە عێراقییەکان پێگەیشت بۆ ڕاگرتن و قەدەغەکردنی ئەپەکە، بەو پێیەی بابەتی تێدایە کە بۆ خەڵک و خێزانەکان ناگونجێت.
بەوتەی ناوبراو، تەنها ئەوان نین بڕیارەکان دەدەن، داواکارییەکان پێشکەشکردووە، بەڵام هیچ وەڵامێکیان وەرنەگرتووە، دەشڵێت، "هیوادارین پەرلەمانی عێراق بڕیارێک لەسەر ئەو بابەتە دەربکات، و جێبەجێی دەکەین".
|