سودانی سەرکەوتنێکی بێ وێنە لەبەرامبەر پلانەکانی دەرەوە رادەگەیەنێت
نها نیوز - هەواڵەکان
سەرۆک وەزیرانی عێراق رایدەگەیەنێت، کە هەندێک لایەن ویستویانە عێراق بچێتە شەڕ و ململانێ، بەڵام مامەڵەی ژیرانە رێگریکرد لەوەی پریشکی ئاگری جەنگ بگاتە ئەو وڵاتە.
محەمەد شیاع سودانی، سەرۆک وەزیرانی عێراق دەڵێت "بەمامەڵەکردنی ژیرانە و بەرپرسیارانە توانیمان عێراق بپارێزین و رێگرییمانکرد لەوەی بخلیسکێینە گۆڕەپانی شەڕ و ململانێ".
وتیشی "هەندێک لایەن دەیانویست عێراق بچێتە شەڕ و ململانێ، هەندێک هەن لەسەر گوتاری فیتنە و قەیران و پیلانگێڕییەکان دەژین، دەبێت لەمبارەیەوە هۆشیاربین، بەتایبەتی لە هەڵبژاردنەکانی داهاتوودا".
جگە لەوە، بەڵام ئەمریکا فشارەکانی لەسەر حکومەتی سودانی زیاتر دەکات لەپێناو کۆتایی هاتنی هەژموونی ئێران لەو وڵاتە، بەگوێرەی رێکخراوی "Long War Journal"ـی ئەمریکی، ئیدارەی ترەمپ داوای دۆزینەوەی چارەسەرێک بۆ پرسی هێزەکانی حەشدی شەعبی و گرووپە چەکدارەکان دەکات.
بەمەش چارەسەرەکەش لە سێ سیناریۆی جیاواز پێکدێت کە بریتین لە (چەکداماڵینی گرووپە چەکدارەکان، یەکخستنەوەیان بە تەواوی لەگەڵ هێزە ئەمنییە فەرمییەکان، یان هەڵوەشاندنەوەی حەشدی شەعبی وەک دامەزراوەیەکی سەربازی سەربەخۆ).
جێی ئاماژەیە، لەسەرەتای بەرپابوونی جەنگ لە غەززە و دواتر لە لوبنان و گۆڕانکارییەکانی سوریا، گرووپە چەکدارەکانی سەربە ئێران لە عێراق سەدان هێرشی ئاسمانییان کردەسەر ئیسرائیل و هێزەکانی ئەمریکا، ئەمەش مەترسیی هێرشی ئیسرائیل و ئەمریکای بۆسەر عێراق زیادکردبوو و تائێستاش مەترسیی لەو جۆرە لەئارادیە.
|