نها نیوز-هەواڵەکان
شارەزایەکی بواری ئابووری، کاریگەرییەکانی ئەو باجە نوێیانەی کە دۆناڵد ترەمپ، سەرۆکی ئەمریکا بەسەر عێراقدا سەپێنراوە، ئاشکرا کرد.
نەبیل مەرسومی شارەزای بواری ئابووری، لە پۆستێکی فەیسبووکدا نوسیویەتی،" دۆناڵد ترەمپ، سەرۆکی ئەمریکا باجی بەسەر هەموو ئەو کاڵایانە سەپاندووە کە لە ئەمریکاوە هاوردە دەکرێن بە ڕێژەی جیاواز لە 10% و بەرەو سەرەوە، بەڵام هاوردەکردنی نەوت و گاز و بەرهەمە پاڵاوتەکانی لە باجی گومرگی بەخشیوە".
ئاماژەی بەوەشکرد، "ترەمپ باجی 39%ی بەسەر هەناردەکردنی عێراق بۆ ئەمریکا سەپاند"، دەڵێت،"لەبەرئەوەی هەناردەی عێراق زۆر سنووردارە، بڕیارەکەی ئەمریکا لەوبارەیەوە کاریگەرییەکی کەمی دەبێت. جێبەجێکردنی باجی نوێ کاریگەریی خراپی دەبێت لەسەر بازرگانی و گەشەی ئابووری جیهانی، دواتریش لەسەر گەشەی خواست لەسەر نەوت. لە ئەنجامدا کاریگەریی خراپی دەبێت لەسەر نرخی نەوت، کە لە کاردانەوەیەکی خێرادا دوو دۆلار لەدەست دەدات".
ئەوەشی خستووەتەڕوو، "ڕۆژانی داهاتوو شایەتحاڵی ڕادەی کاریگەرییە نەرێنییەکانی ئەو باجانە دەبن لەسەر نرخی نەوتی جیهانی، هەروەها هەموو وڵاتانی هەناردەکاری نەوت بە عێراقیشەوە بەهۆی ئەو باجە نوێیەی ترەمپەوە زیانیان پێدەگات".
دوێنێ چوارشەممە، دۆناڵد ترەمپ، سەرۆکی ئەمریکا ڕایگەیاند، ئەمڕۆ فەرمانی جێبەجێکردن واژۆ دەکات بۆ سەپاندنی باجی بەرامبەر.
ناوبراو سەپاندنی "باجی گومرگی بە ڕێژەی 26% لەسەر هاوردەکردن لە هیندستان، 34% لەسەر هاوردەکردن لە چین، 32% لەسەر هاوردەکردن لە تایوان، 30% لەسەر هاوردەکردن لە باشووری ئەفریقا، 10% لەسەر هاوردەکردن لە بەریتانیا، 32% لەسەر هاوردەکردن لە ئەندەنوسیا، 10% لەسەر هاوردەکردن لە بەرازیل، 49% لەسەر هاوردەکردن لە کەمبۆدیا، 24% لەسەر هاوردەکردن لە ژاپۆنەوە، و 10% لەسەر هاوردەکردن لە سەنگافورە" ڕاگەیاند.