سودانی گورزێکی کەمەر شکێن لە پۆستێکی باڵایی یەکێتی لە بەغدا دەدات

نها نیوز – هەواڵەکان

بە سكاڵایەكی یاسایی كە پەیوەندی بە دەسەڵاتەكانەوە هەیە، سودانی دەیەوێت پۆستی سەرۆك كۆمار زیاتر لە قاڵب بدات.

بڕیارە دادگای باڵای فیدراڵی عێراق یەكەم دانیشتنی دادبینی لەبارەی سكاڵایەك كە محەمەد شیاع سودانی سەرۆك وەزیرانی عێراق لەسەر هەریەكە لە مەحمود مەشهەدانی، سەرۆكی پەرلەمان و لەتیف رەشیدی سەرۆك كۆمار تۆماریكردووە ئەنجام بدات.

لە سكاڵاكەیدا، سودانی داوا لە دادگای فیدراڵی دەكات:

ـ حوكم بدات بەوەی یاسای دیوانی سەرۆكایەتیی كۆمار ژمارە (4)ی ساڵی 1984 نادەستورییە و هەڵیوەشێنێتەوە.
ـ حوكم بدات بەوەی پەیڕەوی ناوخۆی سەرۆكایەتیی كۆمار ژمارە (1)ی ساڵی 2023 نادەستورییە و هەڵیوەشێنێتەوە.
ـ لە رۆژی دەرچوونی دەستوری كۆماری عێراقەوە لە ساڵی 2005، یاسای دیوانی سەرۆكایەتی ژمارە (4)ی ساڵی 1984 بە نادەستوری لە قەڵەم بدات.

هاوکات كرۆكی سكاڵاكە پەیوەندی بە دەسەڵاتەكانی سەرۆك كۆمار و هەوڵدان بۆ كەمكردنەوە هەیە، ئەمەش لەكاتێكدایە خۆی لە بنەڕەتەوە ئەم پۆستە وەكو "پرۆتۆكۆڵی" تەماشا دەكرێت و دەسەڵاتی جێبەجێكردنی زۆری نییە.

پۆستی سەرۆك كۆمار؛ لە عێراقی دوای سەددام حسێنەوە بەگوێرەی نەریتێكی سیاسی بڕدراوە بە باڵای كورددا و، لەناو كوردیشدا تائیستا ئەم پۆستە بەدەست یەكێتیی نیشتمانی كوردستانەوەیە، لەبەرامبەر ئەمەدا پێكهاتەی شیعە پۆستی سەرۆك وەزیران و سوننەش پۆستی سەرۆكی پەرلەمانی بردووە، سەرۆكی دەسەڵاتی دادوەریش بەردەوام بەدەست شیعەكانەوە بووە.