ئەردۆغان سەردانی عێراق دەکات و ئەنقەرەش چاوەڕێی هاتنی سودانی دەکات بەم زووانە
نها نیوز-هەواڵەکان
وەزیری گواستنەوەی تورکیا ئاشکرایکردووە، محەمەد شیاع سودانی، سەرۆک وەزیرانی عێراق لە چەند ڕۆژی داهاتوودا سەردانی تورکیا دەکات، هاوکات ئەردۆغان سەرۆک کۆماری تورکیاش لە ماوەی دوو مانگی داهاتوودا سەردانی عێراق دەکات.
عەبدولقادر ئورالئۆغڵو، وەزیری گواستنەوەی تورکیا ڕایگەیاندووە، هەردوو وڵات تاوتوێی چەند پرسێک دەکەن، دیارترینیان گەشەپێدانە و ئەوبابەتەش گەیشتووەتە قۆناغی پێشکەوتوو، دەشڵێت، ئەگەر سەردانەکەی ئەردۆغان بۆ بەغدا بێتە دی لەماوەی یەکساڵدا دەبێتە دووەم سەردانی و ئەوەش ڕووداوێکی مێژووییە.
هاوکات، داودئۆغڵو لە لێدوانەکانیدا بۆ میدیاکانی تورکیا ڕایگەیاندووە، قۆناغێکی بەرچاو لە پرۆژەی ڕێگای گەشەپێدان بەدیهاتووە، تورکیا بە بەندەری ئەلفاو لە کەنداوی عەرەبی لە ڕێگەی هێڵی ئاسنین و ڕێگای خێرای 1200 کیلۆمەترییەوە دەبەستێتەوە.
ئاماژەی بەوەشکردووە، ئەگەری چالاککردنی داینامیکی کەرتی تایبەت هەیە سەبارەت بە لایەنی دارایی ڕێڕەوی گەشەپێدان، هەروەها پاڵپشتی دارایی لە قەتەر و ئیماراتی یەکگرتووی عەرەبی و دامەزراوە داراییە نێودەوڵەتییەکان دەبێت.
بەوتەی ناوبراو، پێدەچێت محەمەد شیاع سودانی سەرۆک وەزیرانی عێراق لە چەند ڕۆژی داهاتوودا سەردانی وڵاتەکەیان بکات. هەرچەندە وادەی سەردانەکە یەکلایی نەکراوەتەوە، بەڵام ڕەجەب تەیب ئەردۆغان سەرۆک کۆمارمان بەهەمان شێوە بەنیازە لە نیوەی یەکەمی ئەمساڵدا سەردانی عێراق بکات، پێشبینیش دەکەن ئەو بڕیارانەی لەم سەردانانەدا دراون پەیوەست بن بە ڕێککەوتنەکانی پێشووەوە.
|