سودانی بۆ پزیشکیان: عێراق هەڕەشەکان بۆ سەر ئێران ڕەتدەکاتەوە

نها نیوز-هەواڵەکان

سەرۆک وەزیرانی عیراق، پەیوەندییەکی تەلەفۆنی لە مەسعود پزیشکیان، سەرۆک کۆماری ئێرانەوە پێگەیشت، کە بە بۆنەی جەژنی ڕەمەزانەوە پیرۆزبایی خۆی پێشکەش کرد.

ئەمڕۆ سێشەممە، 01 نیسان، 2025، نووسینگەی ڕاگەیاندنی محەمەدە شیاع سودانی سەرۆک وەزیرانی عیراق، لە بەیاننامەیەکدا ڕایگەیاندووە، لە پەیوەندییەکی تەلەفۆنیدا لە نێوان مەسعود پزیشکیان و محەمەدە شیاع سودانی هەردوولا باسیان لە ڕێگاکانی بەرزکردنەوەی هاوکارییە دووقۆڵییەکانی نێوان هەردوو وڵات لە بوارە جیاوازەکاندا کردووە، بە شێوەیەک کە خزمەت بە بەرژەوەندییەکانی هەردوو گەل بکات.

هەروەها جەختیان لە "گرنگی هەماهەنگی لە نێوان وڵاتانی جیهانی ئیسلامی بۆ ڕووبەڕووبوونەوەی ئاستەنگە هاوبەشەکان و بەرزکردنەوەی ئاسایش و سەقامگیری لە ناوچەکە کردەوە".

هاوکات سودانی جەختی لە ڕەتکردنەوەی عێراق لە هەر جۆرە هەڕەشەیەک بۆ سەر کۆماری ئیسلامی ئێران کردەوە، پابەندبوونی بەغدای بە سەقامگیری و ئاسایشی ناوخۆی و ناوچەیی دووپات کردەوە.