سودانی و شەرع پەیوەندی تەلەفۆنیان ئەنجام دا
نهاننیوز-هەواڵەکان
بۆ یەکەمجار، هەر یەکە لە محەمەد شیاع سودانی، سەرۆک وەزیرانی عێراق و ئەحمەد شەرع، سەرۆکی سوریا پەیوەندییەکی تەلەفۆنیان ئەنجامدا و پیرۆزبایی جەژنیان لە یەکتری کرد.
بەپێی ڕاگەیەندراوی نووسینگەی سودانی، محەمەد شەیاع سودانی، سەرۆک وەزیرانی عێراق ئەمڕۆ سێشەممە لە پەیوەندییەکی تەلەفۆنیدا پیرۆزبایی لە ئەحمەد شەرع، سەرۆکی سوریا کرد بەبۆنەی جەژنی ڕەمەزانەوە.
باس لەوەشکراوە، لەمیانەی پەیوەندییەکەدا سودانی بەبۆنەی پێکهێنانی حکومەتی نوێی سوریاوە هیوا و پیرۆزبایی خۆی ئاڕاستەی گەلی سوریا کرد و جەختی لەسەر هەڵوێستی نەگۆڕی عێراق کردەوە لە پاڵپشتی کردنی هەڵبژاردنەکانی گەلی سوریای برا، گرنگە پڕۆسەی سیاسی هەموو پێکهاتەکان لەخۆبگرێت و یارمەتیدەر بێت بۆ پێکەوەژیانی ئاشتیانە و ئاسایشی کۆمەڵگە، لە پێناو ئایندەیەکی ئارام و سەقامگیردا بۆ سوریا و هەموو ناوچەکە.
بەپێی ڕاگەیەندراوەکە، سودانی لە پەیوەندییەکەدا جەختی لەوە کردەوە کە عێراق دەستدرێژییەکانی قەوارەی زایۆنی بۆ سەر خاکی سوریا ڕەتدەکاتەوە، و پشتیوانی لە یەکڕیزی و یەکپارچەیی خاکی سوریا و سەروەری دەکات لەگەڵ ڕەتکردنەوەی دەستێوەردانی دەرەکی، هەروەها گرنگی هاوکاری هاوبەش لە ڕووبەڕووبوونەوەی هەڕەشەکانی داعش و هاوکاری لە بوارە ئابوورییەکاندا، بە لەبەرچاوگرتنی دەرفەتی هاوبەش.
|