شەپۆلێکی تری بەفربارین بەشێک لەناوچەکانی هەرێم دەگرێتەوە

کەشناسی هەرێم ڕایگەیاند، لە سبەینێ چوارشەممەوە شەپۆلێکی بەفربارین بەشێک لەناوچەکانی هەرێم دەگرێتەوە و پلەکانی گەرما ڕوو لە نزمبوونەوەی زیاتر دەکەن.

ئەمڕۆ سێشەممە بەڕێوەبەرایەتی گشتی کەشناسی هەرێم، رایگەیاند، ئاسمان ساماڵ و سارد دەبێت لەگەڵ بوونی هەندێ پەڵە هەور و ناوچە شاخاوییەکان نیمچە هەور دەبێت، لە شەودا دروست بوونی شەختە و بەستن دەبێت لە سەر ناوچە شاخاوییەکان، سەنتەری پارێزگاکان بۆ سفر پلەی سیلیزی نزم دەبێتەوە .

ئاماژەی بەوەشکرد، سبەینێ چوارشەممە، کەش ساردو نیمچە هەور دەبێت، لە دوای نیوەڕۆ شەپۆلێکی بەفر بارین روو لە بەشێک لەم ناوچانە دەکات (سنووری پارێزگای دهۆک – ئیدارەی زاخۆ -مێرگەسوور -ئامێدی – سنووری ئیدارەی سۆران -بەشێک لە ئیدارەی ڕاپەرین و چیای سەفین لە پارێزگای هەولێر ) بڕی بەفری پێشبینیکراو لە نێوان (5-10) سم دەبێت، لە کاتی زیادبوونی کاریگەری شەپۆڵەکە ئەگەری نمە بارانیش دەبێت بە تێکەڵی لەسەر ناوچەی جیا جیا.

دەشڵێت: پلەکانی گەرما لە هەندێ ناوچە بەرز دەبێتەوە ئەو ناوچانەی لە ژێر کاریگەری شەپۆڵی بەفر دەبێت نزم دەبێتەوە

بەرزترین پلەکانی گەرمای پێشبینیکراو بە پلەی سیلیزی

هەولێر: 7 پلەی سیلیزی

سلێمانی: 5 پلەی سیلیزی

دهۆک: 3 پلەی سیلیزی

زاخۆ: 4 پلەی سیلیزی

هەڵەبجە: 5 پلەی سیلیزی

گەرمیان: 9 پلەی سیلیزی