نهانیوز-هەواڵەکان
شارەزایەکی کەشناسی رایدەگەیەنێت کە بارانبارین تا بەیانی رۆژی دووشەممە بەردەوام دەبێت و پلەکانی گەرما لە 4 بۆ 6 پلە دادەبەزێت.
ئاراس جەبار شارەزای کەشناسی بڵاویکردەوە کە کاریگەری شەپۆلی بارانبارین لەسەر ناوچەکەکە دەستیپێکردوە و بەدرێژای کاتەکان ئاسمان هەوری باراناوی ئەبێت و هەندێک کاتیش لێزمە باران ئەبارێت لەگەڵ چالاکبوونی هەورە بروسکەدا ، پلەکانی گەرماش بەڕاورد بە ئەمڕۆ 6 تا 10 پلە نزمدەبنەوە و کەشێکی تەواو سارد و زستانی دەستپێدەکات.
ئەو شارەزا کەشناسییە سەبارەت بە کەشوهەوای سبەی یەکشەمە دەڵێت" شەپۆلێکی دیکە لەدەریای ناوەراستەوە دەگات بەهۆیەوە ئاستی بارانبارینەکە چرتر و زیاتر ئەبێت و تا بەیانی رۆژی دووشەمە بەردەوامی ئەبێت و پێشبینی ئەکرێت لەسەرجەم ناوچەکانی هەرێمی کوردستان بارانێکی زۆر باش ببارێت و ئاستی ئاویش لە زۆربەی شوێنەکان بەرزببێتەوە و لەناوچە شاخاویە بەرزەکانیش بەفر ببارێت".
بە گوێرەی ئەو شارەزا کەشناسییە پێشبینی دەکرێت لە ناوچە جیاوازەکانی هەرێم ڕێژەی بارانبارین بەم شێوەیە بێت:
پارێزگای دھۆک و ئیدارەی زاخۆ و ناوچە شاخاویەکانی پارێزگاکە 60 - 120 ملم
سەنتەری پارێزگای ھەولێر و بەگشتی دەشتایەکانی ناوچەکە 30 - 60 ملم
ئیدارەی راپەرین و سۆران و ناوچە شاخاویەکانی پارێزگای ھەولێر 80 - 130 ملم
پارێزگای سلێمانی و ناوچە شاخاویەکانی 50 - 80 ملم
پارێزگای ھەڵەبجە و ناوچە شاخاویەکانی 40 - 60 ملم
پارێزگای کەرکوک 40 - 70 ملم ، ناوچەکانی ئیدارەی گەرمیان 40 - 70 ملم